ABŞ-ın Avropadakı hərbi bazalarından Yaxın Şərq istiqamətində “C-17 Globemaster III” hərbi-nəqliyyat təyyarələrinin reyslərinin intensivləşdiyi müşahidə olunur. Hərəkətlilik Vaşinqtonla Tehran arasında gərginliyin davam etdiyi bir vaxta təsadüf edir.
MSNews.az xəbər verir ki, açıq uçuş izləmə platformalarında son günlər ABŞ Hərbi Hava Qüvvələrinə məxsus bir sıra “C-17” təyyarələrinin Ramşteyn və digər Avropa bazalarından CENTCOM-un məsuliyyət zonasına daxil olan istiqamətlərdə uçuşları qeydə alınıb. Bəzi bortların İsrail, Misir və Şərqi Aralıq dənizi bölgəsində göründüyü bildirilir.
C-17 Globemaster III ABŞ ordusunun əsas strateji nəqliyyat təyyarələrindən biridir və ağır texnika, sursat, personal və digər hərbi yüklərin sürətli daşınması üçün istifadə olunur. Buna görə belə uçuşların artması adətən regiondakı hərbi-logistik hazırlığın gücləndirilməsi kimi qiymətləndirilə bilər.
Bununla yanaşı, ABŞ son həftələrdə Yaxın Şərqdə hərbi mövcudluğunu qoruyur. ABŞ Mərkəzi Komandanlığının məlumatlarında “C-17” və “C-5M” təyyarələrinin İranla bağlı əməliyyatlar zamanı regionda yük daşımalarında istifadə edildiyi göstərilir.
Regiondakı ümumi hərbi vəziyyət də gərgin olaraq qalır. “Reuters” yazır ki, Donald Tramp ABŞ-ın 3 noyabr aralıq seçkilərinədək İrana yeni zərbə endirməyəcəyini bildirib, lakin sonrakı dövr üçün hərbi variantı tam istisna etməyib.
ABŞ həmçinin son günlər Böyük Britaniyadakı RAF Fairford bazasından “B-1” bombardmançılarını çıxarıb. Vaşinqton bunu İranla əlaqələndirilən mümkün təhlükə fonunda təhlükəsizlik tədbiri kimi izah edib.
“C-17” reyslərinin artmasını ABŞ-ın regiondakı operativ-logistik hazırlığını gücləndirməsi kimi təqdim etmək mümkündür. Lakin bu uçuşların konkret olaraq İrana qarşı yeni genişmiqyaslı hücum kampaniyasının başlanmasına hazırlıq olduğunu söyləmək üçün hazırda rəsmi təsdiq yoxdur.
