Azərbaycan Prezidenti İlham Əliyev, Rusiya Prezidenti Vladimir Putin və Ermənistanın Baş naziri Nikol Paşinyanın Türkmənistanda qapalı görüş keçirdiyi barədə məlumat yayılıb. Lakin Ermənistan tərəfi bu xəbəri rəsmi şəkildə təkzib edib.
MSNews.az xəbər verir ki, “Kommersant” qəzetinin xüsusi müxbiri Andrey Kolesnikov liderlərin Xəzər Ekoloji Sammitindən sonra təxminən 15 dəqiqə davam edən qapalı görüş keçirdiyini yazıb.
Nəşrin məlumatına görə, görüşün təşkili Rusiya prezidentinin köməkçisi Yuri Uşakov tərəfindən həyata keçirilib. Bildirilir ki, Uşakov MDB Dövlət Başçıları Şurasının geniş tərkibdə iclasının qapalı hissəsində bu məsələni ayrıca Nikol Paşinyan və İlham Əliyevlə müzakirə edib.
“Kommersant” həmçinin iddia edib ki, Paşinyan Xəzər Ekoloji Sammitində iştirak etməsə də, onun başa çatmasını gözləyərək Putin və Əliyevlə görüşüb.
Lakin Ermənistan baş nazirinin mətbuat katibi Melaniya Harutyunyan bu məlumatı təkzib edib. O, Ermənistanın “Armenpress” agentliyinə bildirib: “Belə formatda görüş əslində baş tutmayıb.”
“Azatutyun” da Ermənistan hökumətinin üçtərəfli görüş xəbərini təkzib etdiyini və “Kommersant”ın məlumatının Kreml tərəfindən dərhal təsdiqlənmədiyini yazır.
Azərbaycan Prezidentinin rəsmi saytında da oktyabrın 9-da belə üçtərəfli görüş barədə ayrıca məlumat yayımlanmayıb. Rəsmi arxivdə həmin gün İlham Əliyevin İran Prezidenti Məsud Pezeşkianla görüşü və digər sammit tədbirləri göstərilir, daha sonra isə Prezidentin Türkmənistana işgüzar səfərinin başa çatdığı bildirilib.
