Böyük Britaniya Ukraynaya qarşıdakı qış mövsümünə hazırlıq məqsədilə 54 milyon funt sterlinq, təxminən 72 milyon dollar həcmində yeni enerji və humanitar yardım paketi ayırıb.
MSNews.az xəbər verir ki, yardım paketini Böyük Britaniyanın xarici işlər naziri Ed Miliband bu vəzifədə Ukraynaya ilk səfəri zamanı açıqlayıb.
Paketin 20 milyon funt sterlinqlik hissəsi enerji təhlükəsizliyinə yönəldiləcək. Bu vəsait Rusiyanın zərbələri nəticəsində zədələnən enerji şəbəkəsinin təcili təmiri, ehtiyat generatorların alınması, günəş enerjisi mənbələrinin quraşdırılması və elektrik təchizatının şaxələndirilməsi üçün istifadə olunacaq.
Qalan 34 milyon funt sterlinq isə humanitar ehtiyaclara ayrılıb. Vəsait istilik və su sistemlərinin qorunması və bərpası, eləcə də ehtiyacı olan ailələrə birbaşa maliyyə dəstəyinin göstərilməsi üçün nəzərdə tutulub. Yardım UNICEF, BMT-nin Qaçqınlar üzrə Ali Komissarlığı və Ukrayna Qızıl Xaç Cəmiyyəti kimi tərəfdaşlarla birlikdə həyata keçiriləcək.
Britaniya hökuməti bildirir ki, məqsəd Ukraynanın tammiqyaslı müharibənin beşinci qışına hazırlığını gücləndirməkdir. Son həftələrdə enerji və digər mülki infrastruktura zərbələrin intensivləşməsi bu istiqamətdə əlavə dəstəyi aktuallaşdırıb.
Miliband səfər çərçivəsində Prezident Volodimir Zelenski ilə birlikdə Çerniqov vilayətində son hücum nəticəsində dağıdılmış əraziyə də baş çəkib. Britaniya XİN rəhbəri həmçinin Rusiyaya qarşı yeni sanksiyalar və müharibə cinayətlərinin araşdırılmasına 6 milyon funt sterlinq əlavə maliyyə ayrıldığını açıqlayıb.
