Kanadalı şair və yazıçı Enn Karson 2026-cı il Ədəbiyyat üzrə Nobel mükafatının laureatı elan olunub. İsveç Akademiyası onun şeir, nəsr, tərcümə və klassik mətnləri birləşdirən yenilikçi yaradıcılığını yüksək qiymətləndirib.
MSNews.az xəbər verir ki, Nobel Komitəsinin açıqlamasında Karson mükafata “klassik ənənə ilə oynaq dialoq quraraq müasir ədəbiyyat üçün yeni formalar yaradan cəsarətli və novator yaradıcılığına görə” layiq görülüb.
“Reuters” yazır ki, Karson poeziya, nəsr, esse, tərcümə və dramatik formalar arasında sərhədləri tez-tez aradan qaldıran müəllif kimi tanınır. Onun yaradıcılığında qədim yunan ədəbiyyatı müasir mövzular və eksperimental yazı üsulları ilə birləşir.
Enn Karson 1950-ci ildə Torontoda anadan olub. O, klassik filologiya üzrə təhsil alıb və uzun illər Kanada və ABŞ universitetlərində antik ədəbiyyatdan dərs deyib.
Onun ən məşhur əsərləri sırasında “Qırmızının avtobioqrafiyası”, “Eros the Bittersweet” və “Norma Jeane Baker of Troy” yer alır. Karson qədim yunan mifləri və klassik mətnləri müasir insan münasibətləri, sevgi, itki və kimlik mövzuları ilə yenidən şərh etməsi ilə seçilir.
Yazıçının yaradıcılığında Sapfo və digər qədim yunan müəlliflərinin təsiri xüsusilə nəzərə çarpır. Bununla yanaşı, Karson müasir poeziya və vizual sənət elementlərini də əsərlərinə daxil edir.
2026-cı il Nobel mükafatının məbləği 12 milyon İsveç kronudur. Mükafat ənənəvi olaraq dekabrın 10-da Stokholmda keçiriləcək mərasimdə təqdim olunacaq.
