ABŞ İranla müharibənin dayandırılması üçün Tehranın uranın zənginləşdirilməsi imkanlarını əhəmiyyətli dərəcədə azaltmasını əsas şərtlərdən biri kimi irəli sürüb. Vaşinqton bildirir ki, gələcək razılaşma yalnız siyasi vədlərlə məhdudlaşmamalı, konkret nüvə güzəştlərini də əhatə etməlidir.
MSNews.az xəbər verir ki, “Reuters” agentliyinə müsahibəsində ABŞ vitse-prezidenti Cey Di Vens deyib ki, Tehran nüvə silahı hazırlamaq niyyətində olmadığını göstərmək istəyirsə, yüksək səviyyədə zənginləşdirilmiş urana ehtiyacının olmadığını nümayiş etdirməlidir.
Vens bildirib ki, Vaşinqton İranın zənginləşdirmə gücündə “əhəmiyyətli” azalma görmək istəyir. ABŞ tərəfinin tələbləri arasında yüksək səviyyədə zənginləşdirilmiş uran ehtiyatlarının azaldılması və ya aradan qaldırılması məsələsi də var.
ABŞ və İran son aylarda hərbi əməliyyatların dayandırılması və Hörmüz boğazında normal gəmiçiliyin bərpası məqsədilə bir-birinə müxtəlif razılaşma layihələri təqdim ediblər. Bununla belə, Prezident Donald Tramp İranın son təklifini rədd edib.
Vens həmçinin Vaşinqtonun İran daxilində yekun qərarların kim tərəfindən verildiyini tam aydın görmədiyini bildirib. O, ABŞ tərəfinin İran rəhbərliyində qərar qəbuletmə mexanizminin mürəkkəb olduğu qənaətinə gəldiyini deyib.
İran isə uranın zənginləşdirilməsi hüququnun müzakirə predmeti olmadığını bildirir və ABŞ-ın tələblərini rədd edir. Tehran nüvə proqramının dinc məqsədlər daşıdığını vurğulayır. Beynəlxalq Atom Enerjisi Agentliyi indiyədək İranın aktiv nüvə silahı proqramına malik olduğunu təsdiqləyən sübut açıqlamayıb, lakin 60 faizə qədər zənginləşdirmə səviyyəsi beynəlxalq narahatlıq doğurur.
Tramp oktyabrın 8-də ABŞ-ın noyabrın 3-də keçiriləcək Konqres aralıq seçkilərinədək İrana yeni zərbələr endirməyəcəyini də bildirib və Tehranla “məhsuldar danışıqların” davam etdiyini qeyd edib.
Hörmüz boğazında vəziyyət isə gərgin olaraq qalır. Son hücumlar fonunda boğazdan keçən ticarət gəmilərinin sayı son iki aydan artıq müddətdə ən aşağı həddə düşüb.
