Azərbaycandan Ukraynaya elektrik avadanlıqlarından ibarət növbəti humanitar yardım partiyası göndərilib. Yardımın ümumi dəyəri 2,5 milyon manat təşkil edir.
MSNews.az xəbər verir ki, yük Sumqayıt Texnologiyalar Parkının ərazisindən yola salınıb. Humanitar yardım Ukrayna tərəfinin müraciəti əsasında formalaşdırılıb.
Yükün tərkibinə kabel, naqil, transformator və digər elektrik avadanlıqları daxildir.
Yardımın göndərilməsi Prezident İlham Əliyevin 21 sentyabr 2026-cı il tarixli sərəncamına əsasən, Energetika Nazirliyi tərəfindən təmin edilib.
Ukraynanın Azərbaycandakı səfiri Yuri Qusev də yardımla bağlı bildirib ki, göndərilən partiyaya transformatorlarla yanaşı 186 kilometr elektrik kabeli daxildir və avadanlıqlar 10 yük maşını ilə daşınır. O, göstərilən dəstəyə görə Azərbaycan rəhbərliyinə və xalqına təşəkkür edib.
Azərbaycan bundan əvvəl də Ukraynanın enerji infrastrukturunun dəstəklənməsi məqsədilə elektrik avadanlıqlarından ibarət humanitar yardımlar göndərib. Məsələn, 2026-cı ilin yanvarında ölkəyə ümumi dəyəri 1 milyon ABŞ dolları olan generator, transformator, kabel və digər avadanlıqlar yola salınmışdı.
