Türkiyədə bələdiyyələrə qarşı aparılan yeni korrupsiya və tender istintaqları çərçivəsində Mersin, Eyüpsultan və Ataşehir daxil olmaqla bir neçə yerli idarəetmə qurumunun rəhbəri həbs edilib.
MSNews.az xəbər verir ki, Mersin Cumhuriyyət Baş Prokurorluğunun apardığı istintaq çərçivəsində Mersin Böyükşəhər Bələdiyyəsinin sədri Vahap Seçer, Yenişehir bələdiyyəsinin sədri Abdullah Özyiğit və Mezitli bələdiyyəsinin sədri Ahmet Serkan Tuncer barəsində həbs qərarı verilib. Ümumilikdə 60 şübhəlidən 50-si həbs tələbi ilə məhkəməyə göndərilib.
Araşdırmanın ilkin mərhələsində Mersin Böyükşəhər Bələdiyyəsinə aid 13 tender və 63 birbaşa satınalma dosyesində pozuntuların aşkarlandığı, ümumi dövlət zərərinin isə təxminən 330,9 milyon lirə olduğu bildirilib. Bu rəqəmlər istintaq orqanlarının ekspert hesabatına əsaslanan hesablamalarıdır.
Mezitli və Yenişehir bələdiyyələri üzrə də ayrıca maliyyə zərəri hesablamaları aparılıb. “Euronews” yazır ki, üç bələdiyyə üzrə ümumi iddia edilən zərər 1,4 milyard lirəni keçir. Mezitli bələdiyyə sədri Ahmet Serkan Tuncer barəsində, bundan əlavə, “silahlı cinayət təşkilatına rəhbərlik” ittihamı üzrə ayrıca araşdırma aparılır.
İstanbulda isə Eyüpsultan bələdiyyə sədri Mithat Bülent Özmen və daha 12 şübhəli həbs edilib. İstintaq çərçivəsində bələdiyyə tenderlərinə qanunsuz müdaxilə, rüşvət və cinayətkar təşkilatda iştirak ittihamları araşdırılır. Məhkəmə Özmeni tenderə müdaxilə, rüşvət alma və cinayət təşkilatına üzvlük ittihamları əsasında həbs edib.
İstintaq materiallarında yeddi tender dosyesi, telefon və rabitə qeydləri, şahid ifadələri və rəsmi bələdiyyə sənədlərinin araşdırıldığı bildirilir.
Ataşehirdə isə bələdiyyə sədrinin vəkili Murat Güneş və daha dörd nəfər həbs olunub. Güneş, bələdiyyə sədri Onursal Adıgüzelin aprel ayında həbsindən sonra aprelin 30-da bələdiyyə məclisi tərəfindən sədr vəkili seçilmişdi.
Ataşehir üzrə istintaq “rüşvət”, “hədə-qorxu ilə mənimsəmə”, “tenderə müdaxilə” və “cinayət törətmək məqsədilə təşkilat yaratma” kimi ittihamları əhatə edir. İstintaqın genişləndirilməsində rəqəmsal materiallar, CİMER müraciətləri, şahid ifadələri və bəzi şirkət nümayəndələrinin ifadələrinin rol oynadığı bildirilir.
Son həbs dalğası Türkiyədə müxalifətin idarə etdiyi bələdiyyələr ətrafında aylardır davam edən istintaqlar fonunda baş verir. “Reuters” yazır ki, müxalifət bu proseslərin siyasi motivli olduğunu iddia edir, Türkiyə hökuməti isə məhkəmə və prokurorluğun müstəqil fəaliyyət göstərdiyini bildirir.
Qeyd edək ki, adı çəkilən şəxslər barəsində istintaqlar davam edir və irəli sürülən ittihamlar üzrə yekun məhkəmə hökmü verilməyib.
