Bakı oktyabrın 17–18-də sumo üzrə dünya çempionatına ev sahibliyi edəcək. Yarışlar Bakı İdman Sarayında keçiriləcək və 30-a yaxın ölkədən idmançıların iştirakı gözlənilir.
MSNews.az xəbər verir ki, çempionatda kişilər, qadınlar, eləcə də 18 yaşadək qız və oğlanlar fərdi və komanda yarışlarında mübarizə aparacaqlar.
Yarışlar sumoya məxsus ənənəvi “dohyo” meydanında keçiriləcək. Təşkilatçılar açılış mərasimində xüsusi şou proqramının da təqdim olunacağını bildirirlər.
Proqrama əsasən, 17 oktyabrda 18 yaşadək qız və oğlanların, 18 oktyabrda isə kişilər və qadınların yarışları baş tutacaq.
Azərbaycanın Gənclər və İdman Nazirliyi daha əvvəl 2026-cı ildə Bakının sumo üzrə dünya çempionatına ev sahibliyi edəcəyini beynəlxalq yarışlar təqvimində də göstərmişdi. İlkin təqvimdə yarış sentyabr ayı üçün nəzərdə tutulsa da, son rəsmi açıqlamada tarixlər 17–18 oktyabr olaraq müəyyənləşdirilib.
Çempionat Bakının 2026-cı ildə ev sahibliyi etdiyi iri beynəlxalq idman tədbirlərindən biri olacaq.
