ABŞ Prezidenti Donald Tramp 2009-cu ildə Texasdakı Fort-Hud hərbi bazasında 13 nəfəri öldürən keçmiş ordu mayoru Nidal Həsənin güllələnmə dəstəsi tərəfindən edam edilməsini təsdiqləyib.
MSNews.az xəbər verir ki, “Reuters” məlumatına görə, müdafiə naziri Pit Heqset Həsənin ABŞ Ordusunun güllələnmə dəstəsi tərəfindən edam edilməsini tövsiyə edib, Tramp isə bu tövsiyəni təsdiqləyib.
Edamın konkret vaxtı və yeri ABŞ Ordu katibi tərəfindən müəyyənləşdiriləcək. Bununla belə, Həsənin federal məhkəmələrdə əlavə hüquqi addımlar ataraq prosesi gecikdirmək imkanı qalır.
Nidal Həsən 5 noyabr 2009-cu ildə Fort-Hud bazasındakı hərbi personalın yerləşdirməyə hazırlanması mərkəzində atəş açmışdı. Hücum nəticəsində 13 nəfər öldürülüb, 32 nəfər yaralanıb. Həsən hadisə yerində polis tərəfindən güllələnərək zərərsizləşdirilib və iflic vəziyyətində qalıb.
O, 2013-cü ildə hərbi məhkəmə tərəfindən qəsdən adam öldürmə və adam öldürməyə cəhd maddələri üzrə təqsirli bilinərək ölüm cəzasına məhkum edilib. Həsən məhkəmədə hücumu ABŞ hərbçilərinin Əfqanıstana göndərilməsinin qarşısını almaq məqsədilə törətdiyini bildirmişdi.
Əgər qərar icra olunarsa, bu, ABŞ ordusunun 1961-ci ildən bəri həyata keçirdiyi ilk edam olacaq. ABŞ hərbi ədliyyə sistemində ölüm hökmünün icrası üçün prezidentin şəxsi təsdiqi tələb olunur.
Qeyd edək ki, Fort-Hud bazasının adı sonradan Fort-Kavazos olaraq dəyişdirilib.
