Hindistanda sentyabr ayında keçirilən bir sıra hindu dini festivalları və yürüşləri zamanı müsəlmanları hədəfə alan çıxışlar, dini məkanlarla bağlı təhdidlər və silahlanmağa çağırışlar qeydə alınıb.
MSNews.az xəbər verir ki, “Citizens for Justice and Peace” (CJP) təşkilatı oktyabrın 1-də yayımladığı monitorinq hesabatında Uttar Pradeş, Maharaştra, Qərbi Benqal və digər bölgələrdə baş verən bir sıra hadisələri təhlil edib. Təşkilatın qənaətinə görə, müxtəlif çıxışlarda dini kimlik müsəlmanları “təhlükə” və ya “kənar qüvvə” kimi təqdim etmək üçün istifadə olunub.
Hesabatda sentyabrın 4-də Uttar Pradeş ştatının Basti şəhərində “Vishva Hindu Mahasangh” lideri Akhilesh Singhin Mathuradakı məscidlə bağlı çıxışı xüsusi qeyd olunur. CJP-yə görə, Sinqh Babri məscidinin sökülməsinə istinad edərək Mathuradakı məscidin də aradan qaldırılması və hindu məbədinin “azad edilməsi” fikrini səsləndirib.
Sentyabrın 8-də isə Maharaştranın Açalpur şəhərində keçirilən dini yürüş zamanı iştirakçıların məscidin qarşısında “Hanuman Chalisa” oxuduqları və “Jai Shri Ram” şüarları səsləndirdikləri bildirilir. Keçmiş deputat Navneet Rananın da mərasimdə iştirak etdiyi, hadisədən sonra ərazidə təhlükəsizlik tədbirlərinin gücləndirildiyi qeyd olunur.
CJP-nin diqqət çəkdiyi digər məqam silahlanma çağırışlarıdır. Təşkilatın məlumatına görə, sentyabrın 14-də Kanpur Dehatda keçirilən “Ganesh Utsav” tədbirində “Shiv Shakti Akhada”nın rəhbəri Madhuram Sharan Shiva hinduları dini müdafiə adı altında silah əldə etməyə çağırıb.
Shivanın bu tip çıxışları daha əvvəl də qeydə alınıb. “Newslaundry” yanvar ayında dərc etdiyi araşdırmada onun rəhbərlik etdiyi qrupun müxtəlif yürüşlərdə silah nümayiş etdirdiyini və dini azlıqlara qarşı sərt ritorikadan istifadə etdiyini yazıb.
Hesabatda Qərbi Benqalda səsləndirilən “banqladeşli infiltratorlar” ifadəsinə də diqqət çəkilir. CJP bildirir ki, bəzi çıxışlarda qanunsuz miqrasiya ilə bağlı iddialar bütövlükdə müsəlman icması ilə əlaqələndirilib, müsəlman siyasi xadimlər isə hindu mədəniyyətinə qarşı qüvvələr kimi təqdim olunub.
Təşkilatın təhlilinə görə, ayrı-ayrı ştatlarda hadisələrin detalları fərqlənsə də, ritorikanın ümumi modeli oxşardır: lokal və ya siyasi mübahisə əvvəlcə hindu icmasına qarşı geniş təhlükə kimi təqdim edilir, daha sonra müsəlmanlar kollektiv “düşmən” obrazında göstərilir və auditoriyaya dini kimliyi qorumaq üçün sərt müqavimət göstərmək çağırışı edilir.
Qeyd edək ki, CJP-nin materialı hüquq-müdafiə təşkilatının apardığı monitorinq və onun hadisələrə verdiyi qiymətləndirməyə əsaslanır. Hesabatda yer alan bütün iddialar üzrə Hindistan hakimiyyətinin vahid rəsmi mövqeyi açıqlanmayıb.
