Cənubi Koreyanın Milli Kəşfiyyat Xidməti (NIS) Şimali Koreya lideri Kim Çen Inın çəkisinin 140 kiloqramdan çox olduğunu və onun “ağır dərəcəli piylənmə” vəziyyətində olduğunu qiymətləndirib. Seulun kəşfiyyat orqanına görə, buna baxmayaraq, hazırda Şimali Koreya liderinin səhhətində ciddi problemin olduğunu göstərən aydın əlamətlər yoxdur.
MSNews.az xəbər verir ki, NIS-in qiymətləndirməsi sentyabrın 30-da Cənubi Koreya parlamentinin Kəşfiyyat Komitəsinin qapalı iclasında təqdim olunub. İclasdan sonra məlumatı hakim və müxalifət partiyalarını təmsil edən deputatlar jurnalistlərə açıqlayıblar.
Kəşfiyyat xidmətinin hesablamasına görə, Kim Çen In çəkisi səbəbindən ürək-damar xəstəlikləri üzrə yüksək risk qrupundadır. Bununla belə, NIS onun fiziki aktivliyində ciddi çətinlik müşahidə etmədiyini bildirib. Deputat Yun Qon Yonun sözlərinə görə, Kim hətta pilləkənləri qaçaraq qalxa bilir. Kəşfiyyat xidməti onun şəxsi tibbi heyət tərəfindən yaxından nəzarətdə saxlanıldığını da qeyd edib.
“AFP” xatırladır ki, Kim Çen In uzun müddətdir çox siqaret çəkən şəxs kimi tanınır. Onun atası Kim Çen İr və babası Kim İr Sen də ürək-damar problemləri yaşayıb və hər ikisi infarktdan vəfat edib.
Kim Çen Inın qidalanma vərdişləri barədə məlumatlar isə əsasən keçmişdə onun aşpazları ilə işləmiş şəxslərin açıqlamalarına söykənir. 2019-cu ildə Hanoy sammiti zamanı Kim Çen Inın şəxsi aşpazları ilə çalışan aşpaz Pol Smart onun kürü, omar, fua-qra və nadir ət növlərinə üstünlük verdiyini bildirmişdi.
Kim Çen Inın çəkisi ilə bağlı yeni məlumat fonunda onun Çin internetində illər əvvəl yayılmış “Jin San Pang” (金三胖) ləqəbi də xatırlanıb. İfadə təxminən “Üçüncü kök Kim” mənasını verir və Şimali Koreya liderini ələ salmaq məqsədilə işlədilib.
2018-ci ildə “Yonhap” Çin internetində bu ifadə üzrə axtarışların “Baidu” və “Weibo” kimi platformalarda bloklandığını yazmışdı.
