Mərakeş Kralı VI Məhəmməd Fatimə əz-Zəhra əl-Mənsurini ölkənin yeni hökumət başçısı təyin edib. Bununla da 50 yaşlı əl-Mənsuri Mərakeş tarixində hökumətə rəhbərlik edən ilk qadın olub.
MSNews.az xəbər verir ki, kral sentyabrın 29-da əl-Mənsurini Rabatdakı Kral Sarayında qəbul edib. Kral Sarayının rəsmi açıqlamasına əsasən, VI Məhəmməd Konstitusiyanın 47-ci maddəsinə uyğun olaraq onu hökumət başçısı təyin edib və yeni hökuməti formalaşdırmağı tapşırıb.
Təyinat sentyabrın 23-də keçirilmiş parlament seçkilərinin ardınca baş tutub. Əl-Mənsurinin kollektiv rəhbərliyinin koordinatoru olduğu “Authenticity and Modernity Party” (PAM) 395 yerlik Nümayəndələr Palatasında 97 mandat əldə edərək seçkilərdə birinci olub.
İkinci yeri 66 mandatla Milli Müstəqillər Birliyi (RNI), üçüncü yeri isə 65 mandatla İstiqlal Partiyası tutub. Ədalət və İnkişaf Partiyası (PJD) 54 mandat əldə edib.
Mərakeş Konstitusiyasına əsasən, kral hökumət başçısını parlament seçkilərində ən çox mandat qazanan partiyanın sıralarından təyin edir.
PAM seçkilərdə birinci olsa da, parlamentdə təkbaşına hökumət qurmaq üçün tələb olunan 198 mandatlıq çoxluğa sahib deyil. Buna görə əl-Mənsurinin qarşısında duran ilk siyasi vəzifə digər partiyalarla danışıqlar apararaq koalisiya hökuməti formalaşdırmaqdır.
“Reuters”-in məlumatına görə, əl-Mənsuri koalisiya danışıqlarında əvvəlcədən “qırmızı xətlər” müəyyən etməyəcəyini bildirib. Potensial tərəfdaşlar sırasında RNI və İstiqlal Partiyası da yer alır.
Əl-Mənsuri hüquqşünasdır və Mərakeş siyasətində uzunmüddətli təcrübəyə malikdir. O, daha əvvəl mənzil və şəhərsalma naziri vəzifəsində çalışıb və Mərakeşin əsas şəhərlərindən biri olan Mərakeş şəhərinin meri olub. 2024-cü ildən PAM-ın kollektiv rəhbərliyinin üç üzvündən biridir.
Yeni hökumətin qarşısında iqtisadi və sosial problemlərlə yanaşı, Mərakeşin İspaniya və Portuqaliya ilə birlikdə ev sahibliyi edəcəyi 2030-cu il futbol üzrə dünya çempionatına hazırlıq da əsas gündəm mövzularından biri olacaq.
