İslandiyanın xarici işlər naziri Torgerdur Katrin Qunnarsdottir BMT Baş Assambleyasındakı çıxışında İsrailin Baş naziri Benyamin Netanyahunun bir neçə gün əvvəl eyni tribunadan işlətdiyi “mənəvi qorxaqlar” ifadəsinə cavab verib. İslandiyalı nazir bu ifadəni sülh danışıqlarından imtina edən, humanitar yardıma mane olan və beynəlxalq hüquqa hörmət etməyən liderlərə yönəldib.
MSNews.az xəbər verir ki, Qunnarsdottir sentyabrın 26-da BMT Baş Assambleyasının 81-ci sessiyasında çıxış edib.
“Biz bu tribunadan ‘mənəvi qorxaqlar’ ifadəsini eşitdik. Mənim üçün mənəvi qorxaqlar ədalətli və davamlı sülhə nail olmaq üçün danışıqlar masasına əyləşməkdən imtina edən dünya liderləridir. Ümidsiz şəkildə humanitar yardıma ehtiyacı olan insanların bu yardıma çıxışını əngəlləyənlər və beynəlxalq hüquqa dəfələrlə qarşı çıxaraq ona hörmətsizlik edən liderlər mənəvi qorxaqlardır”, – nazir bildirib.
Qunnarsdottir daha sonra diqqəti Qəzzadakı vəziyyətə yönəldib. O bildirib ki, fələstinli mülki şəxslərin iztirablarının “fon səs-küyünə” çevrilməsinə imkan vermək olmaz və uşaqların öldürülməsinin, ailələrin evlərini itirməsinin davam etdiyini vurğulayıb. Nazir Qəzzanın münaqişənin əsas səbəbləri həll edilmədən dəfələrlə dağıdılıb yenidən qurulmasını qəbuledilməz adlandırıb.
İslandiya XİN rəhbəri İordan çayının Qərb sahilində İsrail yaşayış məntəqələrinin genişlənməsini də tənqid edib. O, fələstinli mülki şəxslərin məskunlaşanların zorakılığı ilə üzləşdiyini və bunun cəzasızlıq, təhrikedici ritorika və müəyyən siyasətlərlə gücləndiyini bildirib. Gunnarsdottir İslandiyanın məqsədinin İsrail və Fələstinin yanaşı, təhlükəsizlik, ləyaqət və sülh şəraitində mövcud olduğu iki dövlətli həll olduğunu deyib.
Nazirin sözləri Netanyahunun sentyabrın 24-də BMT Baş Assambleyasındakı çıxışına cavab idi. İsrail Baş naziri tribunaya çıxarkən onlarla nümayəndə etiraz əlaməti olaraq zalı tərk etmişdi. Netanyahu buna cavab olaraq: “Əgər zalı hələ tərk etməmiş başqa mənəvi qorxaqlar varsa, indi gedə bilərlər”, – demişdi.
Netanyahu həmin çıxışında İsrailin hərbi əməliyyatlarını müdafiə edib və Qəzzada soyqırımı törədilməsi barədə ittihamları rədd edib. İsrail hökuməti hərbi əməliyyatların HƏMAS-a qarşı yönəldiyini bildirir.
