Ukrayna Silahlı Qüvvələrinin Pilotsuz Sistemlər Qüvvələri Rusiyanın cənub regionlarında və Krımda 14 hərbi hədəfin vurulduğunu açıqlayıb. Hədəflər arasında Su-33 və MiQ-29 qırıcıları, “Orion” zərbə-kəşfiyyat PUA-sı, S-400 mövqeyi, “Tor” və “Pantsir-S1” kompleksləri, həmçinin səkkiz radar sistemi göstərilir.
MSNews.az xəbər verir ki, bu barədə Pilotsuz Sistemlər Qüvvələrinin komandanı Robert “Madyar” Brovdi avqustun 23-də məlumat yayıb. “Ukrainska Pravda” onun açıqlamasına istinadən bildirir ki, hədəflərdən 11-i Rusiyanın Rostov vilayəti və Krasnodar diyarında, üçü isə Krımda yerləşib.
Brovdi bildirib ki, Krasnodar diyarının Vityazevo aerodromunda Su-33 və MiQ-29 qırıcıları, eləcə də “Orion” PUA-sı vurulub. Avqustun 24-də Ukrayna Baş Qərargahı əvvəlki zərbələrin nəticələrinin dəqiqləşdirildiyini və hər üç hava vasitəsinin zədələndiyini təsdiqləyib. Buna görə onların tam məhv edildiyi barədə məlumat hələlik təsdiqlənməyib. Bu barədə “UNN” məlumat yayıb.
Ukrayna tərəfinin açıqladığı siyahıya Rostov vilayətində “Tor” zenit-raket kompleksi, iki “Nebo-U”, iki “Kasta-2E2” və iki “Podlyot” radarından bir hissəsi, Krasnodar diyarında isə Yeyskdə “Pantsir-S1” kompleksi və Gelencik yaxınlığında S-400 “Triumf” divizionunun mövqeyi daxildir. Krımda Sevastopol yaxınlığında “Nebo-U”, Uyutnoyedə 36D6M və Yevpatoriya istiqamətində ST-68 radarlarının vurulduğu bildirilir. “ArmyInform” hədəflərin tam siyahısını dərc edib.
Brovdi əməliyyatlarda Pilotsuz Sistemlər Qüvvələrinin 1-ci Əməliyyat Mərkəzinin, 413-cü “Reyd” alayının, 414-cü briqadanın “Madyarın Quşları” bölməsinin və 20-ci “K-2” briqadasının iştirak etdiyini bildirib. “Kyiv Post” zərbələrin Rusiya aviasiyası ilə yanaşı hava hücumundan müdafiə sistemlərinin aşkarlama və müdafiə imkanlarını zəiflətməyə yönəldiyini qeyd edir.
ABŞ mərkəzli Müharibənin Tədqiqi İnstitutu – ISW də Brovdinin açıqlamasını qeydə alaraq Ukraynanın son dövrdə Rusiyanın arxa cəbhəsində HHM sistemlərini və radar şəbəkəsini hədəfə alan zərbələrini intensivləşdirdiyini bildirib.
Bununla belə, 14 hədəfin hamısına dəyən zərbələrin nəticələri müstəqil şəkildə tam təsdiqlənməyib. Rusiya tərəfi açıqlanan texnika itkilərinin bütün siyahısını təsdiqləməyib. Buna görə S-400, “Tor”, “Pantsir” və radarların sıradan çıxarılması barədə məlumatlar hazırda Ukrayna tərəfinin açıqlaması kimi təqdim olunur.
