ABŞ-nin Nevada ştatının Reno şəhəri yaxınlığında sürətlə yayılan “Hawk Fire” yanğını ilə əlaqədar fövqəladə vəziyyət elan edilib və on minlərlə sakin təxliyəyə çağırılıb.
MSNews.az xəbər verir ki, ilkin məlumatlarda şənbə axşamı yanğının 10,5 min akrdan çox ərazini əhatə etdiyi və təxminən min evə təhlükə yaratdığı bildirilirdi. Lakin son məlumatlara görə, bazar günü axşam saatlarında alovun əhatə etdiyi sahə artıq 15 min akrı keçib və yanğının lokallaşdırılması səviyyəsi 0 faiz olaraq qalır.
“Reuters” bildirir ki, Reno şəhərinin şimal-qərbində təxminən 42 min nəfərə məcburi təxliyə əmri verilib, daha 45 min sakin isə vəziyyət pisləşəcəyi təqdirdə ərazini tərk etməyə hazır olmalıdır. Beləliklə, ümumilikdə 87 minə yaxın insan təxliyə və xəbərdarlıq zonalarında yaşayır.
Nevada qubernatoru Co Lombardo Washoe dairəsində fövqəladə vəziyyət elan edib. Yanğınla mübarizəyə Milli Qvardiyanın şəxsi heyəti və helikopterlər də cəlb olunub. Güclü külək, aşağı rütubət və quru bitki örtüyü alovun sürətlə istiqamət dəyişməsinə və yaşayış məntəqələrinə yaxınlaşmasına səbəb olur.
“Associated Press” yanğın nəticəsində indiyədək altı nəfərin — üç mülki şəxsin və üç fövqəladə xidmət əməkdaşının yaralandığını xəbər verir. Bir sıra tikililər yanıb, lakin dəymiş ziyanın tam miqyası hələ müəyyənləşdirilməyib. Bəzi xəstəxanalarda xəstələrin təxliyəsi həyata keçirilib, yollar bağlanıb və minlərlə abonentin elektrik enerjisi kəsilib.
Yanğının insan fəaliyyəti nəticəsində başladığı müəyyən edilib, lakin konkret səbəb hələ araşdırılır. Səlahiyyətlilər bunun qəsdən törədilib-törədilmədiyi barədə məlumat açıqlamayıblar.
“Hawk Fire” şənbə günü Reno yaxınlığındakı Sierra Nevada dağətəyi ərazisində başlayıb. Yanğınsöndürmə xidmətləri küləkli hava şəraitinin alovun söndürülməsini və yayılma istiqamətinin proqnozlaşdırılmasını xüsusilə çətinləşdirdiyini bildirirlər.
