Rusiyanın Ukraynanın Krivoy Roq şəhərindəki böyük ticarət mərkəzinə endirdiyi ikiqat dron zərbəsi nəticəsində ölənlərin sayı 16-ya yüksəlib, 130 nəfər yaralanıb.
MSNews.az xəbər verir ki, son məlumatları “Reuters”, “Associated Press” və Ukraynanın yerli hakimiyyət orqanları yayıb. Yaralananlar arasında 23 uşaq var. Ukrayna Prezidenti Volodimir Zelenskinin açıqlamasına görə, dağıntılar altında axtarışlar davam edir.
Hücum avqustun 21-də günorta saatlarında Krivoy Roqun ən böyük ticarət komplekslərindən birinə həyata keçirilib. Ticarət mərkəzinin operatoru “Interfax-Ukrayna”ya hücuma məruz qalan obyektin “Solneçnaya Qalereya” olduğunu təsdiqləyib. Zərbədən sonra binada genişmiqyaslı yanğın başlayıb.
Şəhər Müdafiə Şurasının rəhbəri Aleksandr Vilkul ilkin hücumdan sonra əraziyə xilasedicilər və təcili yardım briqadalarının gəldiyini, daha sonra isə ticarət mərkəzinə reaktiv mühərrikli ikinci pilotsuz aparatın zərbə endirdiyini bildirib. Prezident Zelenski ikinci hücumun birincidən təxminən 30 dəqiqə sonra, xilasedicilərin hadisə yerində işlədiyi vaxt baş verdiyini deyib.
Zelenski hücumu “tamamilə həyasız və iyrənc” adlandıraraq ikinci zərbənin təcili yardım və xilasetmə əməkdaşlarını hədəfə almaq məqsədi daşıdığını bildirib.
Son məlumatlara görə, ticarət mərkəzində yaranmış yanğın təxminən 9 min kvadratmetr ərazini əhatə edib və artıq söndürülüb. Axtarış-xilasetmə işlərinə Ukraynanın yeddi vilayətindən xilasedicilər və kinoloqlar cəlb olunub.
Yaralıların vəziyyəti barədə məlumatlar gün ərzində dəyişib. Hücumdan sonrakı ilkin məlumatlarda 29 nəfərin, o cümlədən 5 uşağın ağır vəziyyətdə olduğu bildirilirdi. Daha sonrakı yerli məlumatlarda xəstəxanalarda müalicəsi davam edənlərin və ağır vəziyyətdə olanların sayının azaldığı qeyd olunub.
Ukraynanın insan hüquqları üzrə ombudsmanı Dmitri Lubinets hücumu mülki əhalinin toplaşdığı obyektə qəsdən zərbə kimi qiymətləndirib. Rusiya tərəfdən isə hərbi bloger Yuri Kotenok ticarət mərkəzinin anbarlarının Ukrayna Silahlı Qüvvələrinin maraqları üçün istifadə olunduğunu iddia edib. Rusiya Müdafiə Nazirliyi Krivoy Roqdakı konkret ticarət mərkəzinə hücumla bağlı ətraflı rəsmi izahat verməyib.
“Reuters”in son yenilənmiş məlumatına görə, 16 nəfərin ölümü və 130-dan çox yaralının olması təsdiqlənib. Hadisə yerində dağıntıların təmizlənməsi davam etdiyindən yekun rəqəmlərin dəyişməsi istisna edilmir.
