Ukraynanın avqustun 12-də Novorossiysk hərbi-dəniz bazasına endirdiyi zərbə nəticəsində Rusiyanın “Admiral Makarov” və “Admiral Essen” freqatlarının ciddi zədələndiyinə dair yeni peyk görüntüləri yayılıb.
MSNews.az xəbər verir ki, Vantor şirkətinin çəkdiyi peyk görüntülərini təhlil edən “Defence Blog” hər iki gəmidə “Kalibr” qanadlı raketlərinin səkkizhüceyrəli şaquli buraxılış qurğularının yerləşdiyi hissənin yaxınlığında yanğın və zərbə izlərinin göründüyünü bildirir. Bununla belə, peyk görüntüləri həmin sistemlərin tam məhv edildiyini və ya gəmilərin uzunmüddətli olaraq döyüş qabiliyyətini itirdiyini təkbaşına müəyyən etməyə imkan vermir.
Ukrayna Baş Kəşfiyyat İdarəsi və Silahlı Qüvvələrin Baş Qərargahı hücumdan dərhal sonra “Admiral Makarov” və “Admiral Essen”in vurulduğunu rəsmən açıqlayıb. İlkin qiymətləndirməyə görə, Novorossiysk bazasında ümumilikdə dörd Rusiya hərbi gəmisi müxtəlif dərəcədə zədələnib. Hücumda “Neptun” raketləri, “Palyanitsya” reaktiv pilotsuz aparatları və dəniz platformalarından istifadə edildiyi bildirilib.
“The Moscow Times” rusiyalı hərbi bloqerlərin və Ukrayna mənbələrinin təhlillərinə istinadən “Admiral Makarov”un ön göyərtəsində, “Kalibr” buraxılış kompleksinin yaxınlığında zədə görüldüyünü yazır. Həmçinin gəminin arxa üstquruluşundakı radar və peyk rabitə avadanlığının zədələnmiş ola biləcəyi bildirilir. “Admiral Essen”də də əsas zədələrin raket buraxılış qurğusunun yerləşdiyi hissədə olduğu iddia edilir.
Ukraynanın “Krımski veter” kanalı hər iki freqatın zərbə potensialını itirdiyini və ən azı bir il istismardan kənarda qala biləcəyini iddia edir. Lakin bu müddət müstəqil şəkildə təsdiqlənməyib. Vantor görüntülərinin təhlilində də təmir müddətini yalnız peyk fotoları əsasında müəyyənləşdirməyin mümkün olmadığı vurğulanır. Rusiya Müdafiə Nazirliyi gəmilərin zədələnmə dərəcəsi barədə ictimaiyyətə ətraflı məlumat verməyib.
“Admiral Makarov” 2022-ci ildə “Moskva” kreyserinin batırılmasından sonra Qara dəniz donanmasının faktiki flaqmanı kimi göstərilib. Həm “Admiral Makarov”, həm də “Admiral Essen” Ukraynaya zərbələrdə istifadə edilən “Kalibr” raketlərini daşımaq qabiliyyətinə malikdir.
