Rusiyanın BMT-dəki daimi nümayəndəsi Vasili Nebenzya ölkədə yeni kütləvi səfərbərliyin hazırda planlaşdırılmadığını bildirib.
MSNews.az xəbər verir ki, diplomat avqustun 20-də BMT-də jurnalistlərin suallarını cavablandırarkən Rusiyada sentyabrda keçiriləcək Dövlət Duması seçkilərindən sonra mümkün yeni səfərbərlik dalğası barədə yayılan məlumatlara münasibət bildirib.
“Hazırda kütləvi səfərbərliyə ehtiyacımız yoxdur və bildiyim qədərilə, bu, nə planlaşdırılır, nə də gözlənilir”, – Nebenzya deyib. Açıqlamanı “İzvestiya” yayıb.
Bununla belə, diplomat sonrakı fikrində gələcək vəziyyətlə bağlı qəti zəmanət verməyib. “Meduza”-nın yaydığı tam sitata görə, Nebenzya “seçkilərdən sonra nə olacağını görəcəyik” ifadəsini də işlədib. Buna görə onun açıqlaması ilk növbədə hazırkı vəziyyətə aiddir.
Son həftələr Rusiyada yeni səfərbərlik ehtimalı yenidən müzakirə olunur. Ukrayna Prezidenti Volodimir Zelenski Moskvanın sentyabr seçkilərindən sonra yüz minlərlə insanı əlavə olaraq orduya çağırmağa hazırlaşdığını iddia edib. Rusiya rəsmiləri bu məlumatları rədd edirlər.
“The Guardian” isə Kremlə yaxın mənbələrə və Qərb rəsmisinə istinadən hazırda Vladimir Putinin yeni kütləvi səfərbərlik barədə qərar qəbul etdiyinə dair əlamət olmadığını yazıb. Rusiya 2022-ci ilin sentyabrında elan edilən “qismən səfərbərlik” çərçivəsində təxminən 300 min ehtiyatda olan şəxsi orduya çağırmışdı.
