Çin mübahisəli Cənubi Çin dənizində yerləşən Antilop rifində (Antelope Reef) genişmiqyaslı tikintinin ilk mərhələsini başa çatdıraraq təxminən 6 kilometr uzunluğunda süni ada yaradıb.
MSNews.az xəbər verir ki, “Reuters” kommersiya peyk görüntülərinin təhlilinə əsasən, ən azı altı ay davam edən torpaq bərpasından sonra dərinləşdirici və tikinti gəmilərinin ərazini tərk etdiyini bildirib. Adanın cənub-şərqində binaların və helikopter meydançasının tikintisinə də başlanılıb.
Yeni obyektin qarşısında 680 metrlik körpü və dərin sulu liman yaradılıb. Adanın 3 kilometrdən artıq düz sahəsi isə gələcək uçuş-enmə zolağı üçün əlverişli hesab olunur. Vaşinqtonda yerləşən Strateji və Beynəlxalq Araşdırmalar Mərkəzinin “Asia Maritime Transparency Initiative” layihəsi avqust peyk görüntülərində mümkün yeni uçuş-enmə zolağının ilkin qazıntı işlərinin artıq göründüyünü bildirib. Bununla belə, əraziyə hələ beton örtük çəkilməyib və aerodromun tikilməsi rəsmən təsdiqlənməyib.
Pekin tikinti fəaliyyətini hərbi məqsədlərlə əlaqələndirmir. Çin rəsmiləri daha əvvəl Parasel adalarındakı işlərin yerli yaşayış şəraitinin və iqtisadi fəaliyyətin yaxşılaşdırılmasına yönəldiyini bildirmişdilər. Çin dövlət mediasında isə Antilop rifindəki infrastruktura meteoroloji müşahidə və elmi tədqiqat kimi mülki funksiyalar aid edilib. “Reuters”in son sorğusuna Çin Müdafiə Nazirliyi dərhal cavab verməyib.
Bununla belə, təhlükəsizlik ekspertləri adanın Çinin regiondakı hərbi imkanlarını əhəmiyyətli dərəcədə artıra biləcəyini düşünürlər. Analitiklərin fikrincə, burada radar və müşahidə sistemlərinin, eləcə də gələcəkdə hərbi aviasiyanın yerləşdirilməsi Çinin Cənubi Çin dənizinin şimal hissəsinə nəzarətini gücləndirə bilər. “PLATracker” platformasının rəhbəri Ben Lyuis həmin ərazinin Tayvan ətrafında mümkün münaqişə ssenarisində strateji əhəmiyyət daşıdığını bildirib.
Antilop rifi Parasel arxipelaqının cənub-qərbində yerləşir. Çin əraziyə faktiki nəzarət edir, Vyetnam isə rif daxil olmaqla Parasel adalarını öz ərazisi hesab edir. Vyetnam Xarici İşlər Nazirliyi mart ayında Çinin tikinti fəaliyyətinə etiraz edərək Hanoyun rif üzərində suverenlik iddiasını yenidən bəyan edib.
