ABŞ administrasiyası İsrailin müdafiə naziri İsrael Katsın İsrail ordusunun Livanın cənubundakı “təhlükəsizlik zonasında” uzunmüddətli qalacağı barədə açıqlamasına etiraz edib. Vaşinqton belə bir daimi hərbi mövcudluğun İsrail və Livan arasında ABŞ-ın vasitəçiliyi ilə əldə edilmiş razılaşmaya uyğun olmadığını bildirib.
MSNews.az xəbər verir ki, Kats avqustun 12-də Livanın cənubuna səfəri zamanı İsrailin həmin zonadan geri çəkilməyəcəyini deyib. Bundan sonra ABŞ Dövlət Departamentinin yüksək vəzifəli rəsmisi İsrailin Livanda ərazi iddiası olmadığını əvvəlcədən bəyan etdiyini xatırladaraq daimi hərbi mövcudluğun tərəflərin götürdüyü öhdəliklərlə və uzunmüddətli sülhlə uzlaşmadığını bildirib.
Bu barədə “Reuters” məlumat yayıb.
ABŞ-ın reaksiyasından sonra Kats mövqeyini dəqiqləşdirərək İsrail qüvvələrinin “Hizbullah” tərksilah edilənədək və onun yaratdığı təhlükə aradan qaldırılanadək Livanın cənubundan çıxmayacağını bildirib. O, İsrail ordusuna həmin müddət üçün uzunmüddətli logistika və müdafiə hazırlıqlarını tamamlamaq göstərişi verdiyini açıqlayıb.
İsrail və Livan iyunun 26-da Vaşinqtonda ABŞ dövlət katibi Marko Rubionun iştirakı ilə çərçivə sazişi imzalayıblar. Razılaşma Livan ordusunun “Hizbullah” və digər qeyri-dövlət silahlı qruplarının tərksilahını təsdiqləməsi fonunda İsrail qüvvələrinin mərhələli şəkildə geri çəkilməsini və ərazilərin Livan ordusunun nəzarətinə verilməsini nəzərdə tutur. “Reuters” bildirir ki, bu proses ilkin “pilot zonalar” vasitəsilə həyata keçirilir.
“Hizbullah” isə İsrail qüvvələri Livandan çıxmadan silahlarının müzakirəsini rədd edir. Bu mövqe tərəflərin razılaşmanın icrası ilə bağlı əsas fikir ayrılıqlarından biri olaraq qalır.
