ABŞ sentyabrın 30-dək İraqda qalan bütün hərbi qüvvələrinin çıxarılmasını tamamlamağı planlaşdırır. Vaşinqton rəsmisi bu qrafikin qüvvədə qaldığını təsdiqləyib.
MSNews.az xəbər verir ki, “Associated Press” İraq və ABŞ rəsmilərinə istinadən prosesin artıq son mərhələdə olduğunu yazır. İraqın Baş naziri Əli əl-Zaidi ABŞ Mərkəzi Komandanlığının (CENTCOM) rəhbəri admiral Bred Kuperlə görüşdən sonra sentyabrın 30-nu İraqda İŞİD-lə Mübarizə üzrə Qlobal Koalisiyanın hərbi missiyasının başa çatması və qüvvələrin ölkədən çıxışının tamamlanması üçün “qəti və son tarix” kimi təsdiqləyib. İraqın dövlət xəbər agentliyi də eyni mövqeni hökumətin bəyanatına istinadən yayıb.
ABŞ rəsmisi Vaşinqtonun bütün qüvvələrin həmin tarixədək çıxarılacağını gözlədiyini bildirib, lakin hazırda İraqda neçə amerikalı hərbçinin qaldığını və onların hara yerləşdiriləcəyini açıqlamayıb. Kürd rəsmilərinin sözlərinə görə, Ərbil bölgəsindən ABŞ hərbçiləri və hərbi texnikasının çıxarılmasına iyulun sonlarında başlanılıb.
Proses ABŞ və İraqın 2024-cü ildə razılaşdırdığı mərhələli keçid planının davamıdır. İlkin razılaşmaya əsasən, beynəlxalq koalisiyanın İraqdakı əsas hərbi missiyası 2025-ci ilin sentyabrınadək başa çatmalı, İraq ərazisindən Suriyadakı İŞİD qüvvələrinə qarşı əməliyyatlara dəstək verən kontingentin fəaliyyəti isə 2026-cı ilin sentyabrınadək davam etməli idi. ABŞ tərəfi həmin vaxt bunun sadəcə “geri çəkilmə” deyil, ikitərəfli təhlükəsizlik münasibətlərinə keçid olduğunu vurğulamışdı.
ABŞ-ın İraqdakı hərbi mövcudluğu 2003-cü il işğalı ilə başlayıb və 2007-ci ildə amerikalı hərbçilərin sayı 170 mini keçib. Bununla belə, bu mövcudluq 23 il fasiləsiz davam etməyib: ABŞ döyüş qüvvələrini 2011-ci ilin dekabrında çıxarıb, 2014-cü ildə isə İŞİD-in yüksəlişindən sonra İraq hökumətinin dəvəti ilə ölkəyə yenidən hərbi qüvvə göndərib. Sonrakı illərdə təxminən 2 500 ABŞ hərbçisi təlim və İŞİD-ə qarşı əməliyyatlarda iştirak üçün ölkədə saxlanılırdı.
Bağdad xarici qüvvələrin çıxarılmasını ölkədə qeyri-dövlət silahlı qrupların tərksilahı ilə də əlaqələndirir. Əl-Zaidi belə qrupların silahlarını təhvil verməsi üçün də sentyabrın 30-dək vaxt müəyyən edib. Lakin “Associated Press” İranla əlaqəli bəzi güclü silahlı qrupların tərksilahdan imtina etdiyini və bu prosesin müəyyən edilmiş tarixədək tamamlanmasının çətin göründüyünü qeyd edir.
