İlin ən məşhur meteor axınlarından biri olan Perseidlər avqustun 13-də maksimum aktivlik mərhələsinə çatıb. Hesablamalara görə, pik dövr Bakı vaxtı ilə səhər saat 06:00–08:00 intervalına təsadüf edib.
MSNews.az xəbər verir ki, Beynəlxalq Meteor Təşkilatının 2026-cı il təqviminə əsasən, Perseid meteor axını 17 iyul–24 avqust tarixlərində aktivdir. Əsas maksimum avqustun 13-də saat 02:00–04:00 UTC üçün hesablanıb. Bu, Azərbaycan vaxtı ilə 06:00–08:00-a uyğun gəlir.
Lakin Bakıda Günəş avqustun 13-də saat 05:49-da doğub. Buna görə meteor axınının hesablanmış maksimumunun böyük hissəsi artıq işıqlı səmaya təsadüf edib. Bakı və ətrafında Perseidləri izləmək üçün ən əlverişli vaxt gecə yarısından sonra və sübh açılmazdan əvvəl olub.
Bu il müşahidə şəraiti Ay baxımından xüsusilə əlverişli olub. Avqustun 12-də Yeni Ay fazası baş verdiyindən gecə səmasında güclü Ay işığı olmayıb. Beynəlxalq Meteor Təşkilatı bunu Perseidlərin optik müşahidəsi üçün əla şərait kimi qiymətləndirib.
Perseidlər 109P/Swift–Tuttle kometası ilə əlaqəli meteor axınıdır. Yer hər il kometanın orbit boyunca qoyduğu toz və kiçik qaya hissəciklərinin arasından keçdikdə həmin hissəciklər atmosferə yüksək sürətlə daxil olaraq yanır və səmada parlaq işıq izləri yaradır. Perseid meteoroidlərinin atmosferə daxilolma sürəti saniyədə təxminən 59 kilometrə çatır.
İdeal qaranlıq səma şəraitində Perseidlərin nəzəri saatlıq zenit göstəricisi 100 meteoradək çata bilər. Lakin şəhər işıqları, atmosfer şəraiti, müşahidəçinin yerləşdiyi yer və radiantın səma üfüqündəki yüksəkliyi real görünən meteorların sayını xeyli azaldır.
Pik artıq geridə qalsa da, meteor axını başa çatmayıb. Perseidlər avqustun 24-dək aktiv qalacaq, lakin maksimumdan uzaqlaşdıqca onların sayı tədricən azalacaq. Müşahidə üçün şəhər işıqlarından uzaq, açıq səmalı ərazilərin seçilməsi daha məqsədəuyğundur.
