Almaniyada keçirilən yeni sorğu keçmiş kansler Angela Merkelin ölkənin növbəti prezidenti vəzifəsinə mümkün namizədlər arasında ən yüksək ictimai dəstəyə malik olduğunu göstərib.
MSNews.az xəbər verir ki, “n-tv” telekanalının sifarişi ilə “Forsa”nın keçirdiyi sorğuda respondentlərin 47%-i Merkeli federal prezident vəzifəsinə uyğun hesab edib. Bununla belə, 48% onun bu posta uyğun olmadığını bildirib, 5% isə mövqe bildirməyib.
Merkelin dəstəyi müxtəlif siyasi düşərgələri əhatə edir. XDİ/XSİ və SPD tərəfdarlarının hər birində 55%, “Yaşıllar” seçicilərinin 75%-i, Sol Partiya tərəfdarlarının isə 70%-i onu prezidentliyə uyğun hesab edir. Hətta sağçı AfD tərəfdarları arasında bu göstərici 23%-dir.
Digər mümkün namizədlər Merkelin xeyli gerisində qalıb. Bavariya parlamentinin sədri İlze Ayqner 26%, teleaparıcı Günter Yaux 25%, şoumen Hape Kerkelinq isə 24% dəstək əldə edib. Sorğu avqustun 5-6-da 1000 nəfər arasında keçirilib və statistik xəta payı ±3 faiz bəndidir.
Bununla belə, sosial mediada yayılan “almanların 47%-i Merkelə prezident seçkisində səs verməyə hazırdır” ifadəsi texniki baxımdan düzgün deyil. Almaniyada federal prezidenti vətəndaşlar birbaşa seçmirlər. Dövlət başçısını Bundestaq deputatlarından və federal torpaqların nümayəndələrindən ibarət Federal Məclis seçir. Hazırkı prezident Frank-Valter Ştaynmayerin ikinci və son səlahiyyət müddəti 2027-ci ilin yazında başa çatacaq, yeni prezidentin seçilməsi isə yanvarın 30-na planlaşdırılıb.
Merkel özü isə siyasi vəzifəyə qayıtmaq istəmədiyini dəfələrlə bildirib. Fevralda onun prezidentliyə namizəd ola biləcəyi barədə xəbərlərə keçmiş kanslerin ofisindən “Bu, əsassızdır” cavabı verilmişdi. Daha sonra Merkel WDR Avropa Forumunda 16 il kansler işlədiyini xatırladaraq prezident vəzifəsi üçün “daha çox gücü olan” birinin lazım olduğunu söyləyib.
Maraqlıdır ki, ictimai rəydə Merkellə bağlı münasibət son aylarda nəzərəçarpacaq dərəcədə dəyişib. Fevralda keçirilmiş başqa bir “Forsa” sorğusunda yalnız 35% onun prezident olmasını müsbət qarşılayır, 54% isə buna qarşı çıxırdı. Yeni nəticələr keçmiş kanslerin mümkün namizədliyinə münasibətin beş ay ərzində xeyli yumşaldığını göstərir.
