İndoneziya palma yağı əsaslı biodizelin yanacaq qarışığındakı payını 50 faizə çatdıran B50 proqramının məcburi tətbiqinə başlayıb.
MSNews.az xəbər verir ki, B50 yanacağı 50 faiz palma yağı əsaslı biodizel və 50 faiz adi dizeldən ibarətdir. Proqram iyulun 1-dən qüvvəyə minib, rəsmi təqdimat mərasimi isə iyulun 9-da Qərbi Yava əyalətinin Karavanq bölgəsində keçirilib. Yanacaq təchizatçılarına mövcud B40 ehtiyatlarını istifadə etmək üçün sentyabrın 30-dək keçid müddəti verilib.
Bu barədə “Reuters” məlumat yayıb.
Prezident Prabovo Subianto təqdimat mərasimində İndoneziyanın B50 biodizelindən məcburi istifadəni tətbiq edən dünyada ilk ölkə olduğunu bildirib. O, proqramı ölkənin enerji müstəqilliyi istiqamətində mühüm mərhələ adlandırıb və gələcəkdə biodizelin payının 60 faizə çatdırılmasının araşdırılmasını istəyib.
İndoneziyanın Energetika və Mineral Ehtiyatlar Nazirliyinin məlumatına görə, B50 proqramı dizel idxalının dayandırılmasına, valyuta xərclərinin təxminən 170 trilyon rupiyə qədər azaldılmasına və yerli palma yağına tələbatın artırılmasına imkan verəcək. Proqram çərçivəsində biodizel tələbatının 16,7–18 milyon kilolitrə çatacağı gözlənilir.
Energetika naziri Bahlil Lahadalia bildirib ki, B50 proqramının tətbiqi və Balikpapan neft emalı zavodunun istehsal gücünün artırılması nəticəsində ölkədə 3–4 milyon kilolitr həcmində dizel artıqlığı yarana bilər.
Hökumət dövlət enerji şirkəti “Pertamina” ilə birlikdə həmin artıq dizelin aviasiya turbin yanacağına çevrilməsi üçün yol xəritəsi hazırlayır. Yeni istehsal müəssisəsinin tikintisinə gələn il başlanması, aviasiya yanacağı idxalının isə 2026-cı ilin sonunadək dayandırılması planlaşdırılır.
Dünyanın ən böyük palma yağı istehsalçısı olan İndoneziya B50-dən əvvəl 2025-ci ildə 40 faizlik B40 biodizel qarışığından istifadə edirdi. Hökumət yeni proqramın enerji idxalından asılılığı azaltmaqla yanaşı, yerli palma sənayesinə və fermerlərə də əlavə iqtisadi fayda verəcəyini bildirir.
