Ermənistanın keçmiş prezidenti Serj Sarkisyan və onunla əlaqəli şəxslərdən dövlətin xeyrinə təxminən 630 milyon dram tutulacaq.
MSNews.az “Armenia Today”-ə istinadən xəbər verir ki, Ermənistanın Antikorrupsiya Məhkəməsi Baş Prokurorluğun qanunsuz mənşəli əmlakın müsadirəsi ilə bağlı iddiasını qismən təmin edib. Qərar iyulun 3-də qəbul edilib.
Məhkəmə qərarına əsasən, dövlətin xeyrinə Yerevanın Teryan küçəsində yerləşən mənzilin 38 faizlik payı, bir parkinq yeri tam şəkildə və daha bir parkinq yerinin 38 faizlik payı tutulmalıdır. Bundan başqa, bank əmanətləri üzrə faizlər və digər maliyyə vəsaitləri də qərara daxil edilib.
Ümumi məbləğin təxminən 630 milyon dram olduğu bildirilir. Bu, təxminən 1,57 milyon ABŞ dolları və ya 2,64 milyon manat ekvivalentində qiymətləndirilir.
Ermənistan mediasının məlumatına görə, məhkəmə qərarı Serj Sarkisyan və onunla əlaqəli şəxslərə aid olduğu iddia edilən əmlakların mənşəyi ilə bağlı araşdırma çərçivəsində qəbul olunub. İddia Baş Prokurorluğun qanunsuz mənşəli əmlakların müsadirəsi üzrə departamenti tərəfindən qaldırılıb.
Qeyd edək ki, Serj Sarkisyan 2008–2018-ci illərdə Ermənistan prezidenti olub. Onun və yaxın çevrəsinin əmlakı ilə bağlı müxtəlif məhkəmə prosesləri son illərdə Ermənistanın antikorrupsiya gündəminin əsas mövzularından biri olaraq qalır.
