MSNews.az xəbər verir ki, Avropa Komissiyasının rəsmi məlumatına əsasən, oktyabrın 10-dan qüvvəyə minən tədbirlər geniş çeşiddə Ermənistan məhsullarına idxal rüsumlarının müvəqqəti ləğvini və ya azaldılmasını nəzərdə tutur. Güzəştli rejim iki il davam edəcək.
Qərar Rusiyanın Ermənistanın kənd təsərrüfatı və digər ixrac məhsullarına tətbiq etdiyi məhdudiyyətlərə cavab olaraq hazırlanıb. Xüsusilə meyvə-tərəvəz, bitkiçilik məhsulları və içkilərin Avropa bazarına çıxışının genişləndirilməsi nəzərdə tutulur.
Avropa İttifaqı Şurasının açıqlamasına görə, yeni mexanizm bəzi məhsullar üçün gömrük rüsumlarını aradan qaldırmaqla yanaşı, Aİ istehsalçılarını qorumaq məqsədilə xüsusi şərtlər və müdafiə tədbirləri də müəyyən edir.
“Avropeyskaya Pravda” nəşrinin məlumatına görə, qərar oktyabrın 9-da rəsmən elan olunub. Avropa İttifaqı bu addımla Ermənistan istehsalçılarını dəstəkləməyi və ölkənin xarici ticarət bazarlarını şaxələndirməsinə kömək etməyi planlaşdırır.
Ermənistanın iqtisadiyyat naziri Gevorq Papoyan bildirib ki, 2026-cı ilin yanvar-avqust aylarında ölkədə istehsal olunan məhsulların Avropa İttifaqına ixracı əvvəlki ilin müvafiq dövrü ilə müqayisədə təxminən 70 faiz artıb. Eyni zamanda, Avrasiya İqtisadi İttifaqı ölkələrinə ixracda ciddi azalma qeydə alınıb. Bu barədə “Armenpress” məlumat yayıb.
Rusiya Baş nazirinin müavini Aleksey Overçuk isə iki ölkə arasında ticarət dövriyyəsinin kəskin azaldığını açıqlayıb.
“İnterfaks” agentliyinin məlumatına görə, Overçuk bildirib ki, 2024-cü ildə təxminən 12 milyard dollar olan Rusiya-Ermənistan ticarət dövriyyəsi 2025-ci ildə 8 milyard dollara düşüb. Onun sözlərinə görə, 2026-cı ildə bu göstərici əvvəlki illə müqayisədə təxminən üçdə iki qədər azalıb.
Avropa İttifaqının yeni qərarı Ermənistanın Rusiya bazarından asılılığını azaltmaq və Avropa ilə iqtisadi əlaqələrini genişləndirmək səylərinə əlavə imkan yaradır.
Qeyd edək ki, güzəştlər Ermənistanın bütün ixracına deyil, Aİ-yə yönələn ixracının təxminən 80 faizinə şamil olunur. Qərar Avropa Parlamentinin və Aİ Şurasının qəbul etdiyi 2026/2269 nömrəli reqlament əsasında qüvvəyə minib və 2028-ci ilin oktyabrına qədər tətbiq ediləcək.
