Kreml Avropa İttifaqının təhlükəsizlik və müdafiə siyasətindəki dəyişiklikləri Rusiyanın nəzərə almalı olduğu “yeni reallıq” kimi qiymətləndirib.
MSNews.az xəbər verir ki, Kremlin mətbuat katibi Dmitri Peskov Avropa İttifaqının tədricən “hərbi-siyasi-iqtisadi bloka” çevrildiyini bildirib. Peskov Aİ-də “hərbi kimliyin formalaşdığını” və üzv ölkələrin iqtisadiyyatlarının hərbiləşdirilməsinə böyük vəsait ayrıldığını deyib. Onun sözlərinə görə, Moskva bu transformasiyanı öz siyasətində nəzərə alır.
Peskov həmçinin Avropa İttifaqını Ukraynanın gələcək üzvlük perspektivlərini müzakirə edərkən “Şimal axını” qaz kəmərlərinin partladılması ilə bağlı Almaniyada aparılan cinayət işini nəzərə almağa çağırıb. “Infox” yazır ki, Kreml sözçüsü Almaniya prokurorluğunun son addımlarını Kiyevin “terror fəaliyyətinə cəlb olunması” barədə Rusiyanın əvvəlki iddialarının təsdiqi kimi təqdim edib.
Məsələ Almaniya federal prokurorluğunun “Şimal axını” partlayışları ilə bağlı keçmiş ukraynalı hərbçiyə ittiham irəli sürməsindən sonra yenidən gündəmə gəlib. “Reuters”-in məlumatına görə, Almaniya prokurorları Serhii K. kimi təqdim olunan şəxsi 2022-ci ildə qaz kəmərlərinə hücumda iştirakda, partlayış törətməkdə, ictimai xidmətləri pozmaqda və mülki infrastruktura hücumla bağlı hərbi cinayətdə iştirakda ittiham ediblər.
“Associated Press” yazır ki, prokurorluğun versiyasına görə, Serhii K. Rostok limanından saxta sənədlərlə icarəyə götürülmüş yaxtadan istifadə edən qrupun üzvü olub. İttiham tərəfi əməliyyatın Rusiya qazının Almaniyaya nəqlini dayandırmaq və Moskvanın enerji gəlirlərini azaltmaq məqsədi daşıdığını iddia edir. Şübhəli isə ittihamları rədd edir.
“Şimal axını” işi Almaniya-Ukrayna münasibətləri baxımından həssas mövzu olaraq qalır. “The Guardian” qeyd edir ki, Almaniya prokurorluğunun ittihamı Ukrayna dövlət strukturlarının əməliyyətdə iştirakı iddiasını ehtiva edir və bu, Berlinin Kiyevə hərbi dəstəyi fonunda siyasi müzakirələri gücləndirə bilər. Ukrayna Prezidenti Volodimir Zelenski isə məsələ ilə bağlı əlavə məlumat gözlədiyini bildirib.
Kreml sözçüsü Almaniyanın bu fonda Ukraynaya maliyyə və hərbi yardım göstərməyə davam etməsini “paradoksal” adlandırıb. Bununla belə, Ukrayna rəhbərliyi “Şimal axını” partlayışlarında iştirakını rəsmən qəbul etməyib və məhkəmə prosesi yekunlaşmadığı üçün ittihamlar hələlik sübuta yetirilmiş fakt kimi qiymətləndirilmir.
