Rusiya-Ukrayna müharibəsi fonunda Baltikyanı ölkələrin Kiyevə dəstəyi ilə bağlı informasiya mübarizəsi yenidən gündəmə gəlib.
MSNews.az “ERR”-ə istinadən xəbər verir ki, Estoniya Prezident Ofisi Prezidentin təhlükəsizlik məsələləri üzrə müşaviri Madis Rollun rusiyalı prankerlər tərəfindən aldadılması ilə bağlı yayılan məlumatlara münasibət bildirib. Ofis təsdiqləyib ki, Roll bu ilin mayında Rusiyadan edilən saxta telefon zəngi alıb, lakin söhbət zamanı heç bir məxfi məlumat paylaşılmayıb.
Məlumata görə, Rusiya mediasında və təbliğat kanallarında yayılan iddialarda “Vovan və Leksus” kimi tanınan Vladimir Kuznetsov və Aleksey Stolyarovun Rolla Ukrayna Milli Təhlükəsizlik və Müdafiə Şurasının katibi Rustem Umerovun adından danışdığı bildirilib. Həmin iddialara əsasən, Rollun guya Ukraynaya Sankt-Peterburqa hücumların koordinasiyasında yardım etməyə hazır olduğunu dediyi irəli sürülüb. “ERR” yazır ki, Estoniya Prezident Ofisi bu təqdimatı yanlış və təhrif olunmuş hesab edir.
Madis Roll açıqlamasında bildirib ki, söhbətdə Ukraynaya yardım barədə yalnız Estoniya ərazisinə pilotsuz uçuş aparatlarının düşməsinin qarşısını almaq üçün mümkün əməkdaşlıq kontekstində danışıb. Onun sözlərinə görə, Rusiya təbliğatı bu fikirləri öz narrativinə uyğun formada təhrif edib. “ERR”-in məlumatına görə, Prezident Ofisi zəngdən sonra Rollun Estoniyanın müdafiə və təhlükəsizlik qurumlarını məlumatlandırdığını da təsdiqləyib.
Estoniya Prezident Ofisi həmçinin oxşar saxta zənglərin həmin dövrdə digər Baltikyanı ölkələrin nümayəndələrinə də edildiyini bildirib. Ofisin açıqlamasında qeyd olunub ki, Rusiyanın bu cür “səhnələşdirilmiş ifşaları” uğur kimi təqdim etməsi reallığı dəyişmir və Moskvanın Ukraynaya qarşı müharibəyə görə məsuliyyətini azaltmır.
“Shortl.ee” portalı isə hadisəni Rusiya mediasının Estoniya rəsmisini Ukraynanın Rusiya ərazisinə hücumları ilə əlaqələndirmək üçün istifadə etdiyi informasiya kampaniyası kimi qiymətləndirib. Portal yazır ki, söhbətdən seçilmiş fraqmentlər yayımlanaraq Estoniyanın “Rusiya ərazisinə hücumlarda iştirak etdiyi” görüntüsü yaradılmağa çalışılıb.
“Vovan və Leksus” kimi tanınan prankerlər son illərdə bir sıra Qərb siyasətçiləri və ictimai şəxslərlə xarici liderlər və ya rəsmilər adından saxta telefon və videozənglər təşkil etməklə gündəmə gəliblər. “ERR” qeyd edir ki, bu cür söhbətlərdən adətən seçilmiş parçalar yayımlanır və daha sonra Rusiya təbliğat kanalları tərəfindən istifadə olunur.
