Suriya İsrail ordusunun ölkənin cənubunda həyata keçirdiyi əməliyyatları və artilleriya atəşlərini qətiyyətlə pisləyib.
MSNews.az xəbər verir ki, Suriyanın dövlət agentliyi “SANA”nın məlumatına görə, Suriya Xarici İşlər və Mühacirlər Nazirliyi İsrail qüvvələrinin Kuneytra və Dəraa vilayətlərindəki hərəkətlərini ölkənin suverenliyi və ərazi bütövlüyünün pozulması kimi qiymətləndirib.
Məlumata əsasən, İsrail ordusu Dəraa vilayətinin qərbində yerləşən Abidin kəndi istiqamətində artilleriya atəşi açıb. Eyni zamanda İsrail hərbi aviasiyasının Kuneytra və Dəraa vilayətlərinin kənd əraziləri üzərində uçuşlar həyata keçirdiyi bildirilir. Atəşə tutulan ərazilər Suriyanın cənubunda, İsrailin nəzarətində olan Colan yüksəklikləri yaxınlığında yerləşir.
Suriya Xarici İşlər Nazirliyi bəyan edib ki, İsrail qüvvələrinin bu addımları mülki əhali arasında qorxu yaradır və regionda gərginliyin daha da artması riskini gücləndirir. Nazirlik həmçinin hadisəni beynəlxalq hüququn, BMT Nizamnaməsinin və 1974-cü il Qüvvələrin Ayrılması Sazişinin pozulması kimi dəyərləndirib.
“Anadolu Agentliyi” də Suriyanın İsrailin cənub bölgələrindəki əməliyyatlarını pislədiyini yazıb. Agentliyin məlumatına görə, Dəməşq BMT və beynəlxalq ictimaiyyəti təkrarlanan pozuntuların qarşısını almaq üçün məsuliyyət daşımağa çağırıb.
1974-cü il Qüvvələrin Ayrılması Sazişi İsrail və Suriya arasında atəşkəsin qorunmasını və tərəflərin bir-birinə qarşı hərbi əməliyyatlardan çəkinməsini nəzərdə tutur.
İsrail tərəfi bu konkret artilleriya atəşi ilə bağlı hələlik ayrıca rəsmi açıqlama yaymayıb. Bununla belə, “Enab Baladi” İsrail ordusunun bir gün əvvəl Suriyanın cənubundakı “təhlükəsizlik zonası”nda “silahlı şəxsləri” öldürdüyünü açıqladığını yazıb. Nəşrin məlumatına görə, İsrail ordusu əməliyyatın dəqiq yeri və öldürülən şəxslərin sayı barədə əlavə detal təqdim etməyib.
Son aylar Suriyanın cənubunda, xüsusilə Dəraa və Kuneytra istiqamətlərində İsrail qüvvələrinin hərbi fəallığı ilə bağlı məlumatlar artıb. Dəməşq isə bu addımların ölkənin ərazi bütövlüyünə qarşı yönəldiyini bildirir.
