Belçika millisi DÇ-2026-nın qrup mərhələsində Yeni Zelandiyanı 5:1 hesabı ilə məğlub edib.
MSNews.az xəbər verir ki, “G” qrupunun son turunda keçirilən qarşılaşma Kanadanın Vankuver şəhərindəki BC Pleys stadionunda baş tutub. Oyuna üstün başlayan Belçika matç boyunca rəqibindən daha təhlükəli təsir bağışlayıb və böyük hesablı qələbə qazanıb.
Belçikanın əsas qəhrəmanlarından biri Leandro Trossard olub. Hücumçu qarşılaşmada iki dəfə fərqlənərək komandasının inamlı qələbəsində mühüm rol oynayıb.
Kevin De Bruyne, Romelu Lukaku və Aleksis Saelemaekers də Belçika millisinin heyətində qol sevinci yaşayıblar. Yeni Zelandiyanın yeganə qolunu isə Elijah Jast vurub.
Bu nəticə Belçika üçün xüsusi əhəmiyyət daşıyıb. Komanda G qrupunu 5 xalla lider tamamlayaraq 1/32 final mərhələsinə yüksəlib. Misir də qrupda 5 xal toplasa da, Belçika daha yaxşı top fərqinə görə birinci yeri tutub.
Romelu Lukaku matçda vurduğu qolla Belçika futbol tarixində yeni rekorda imza atıb. O, dünya çempionatlarında Belçika millisinin ən çox qol vuran futbolçusuna çevrilib. Kevin De Bruyne isə mundiallarda Belçika adına qol vuran ən yaşlı futbolçu kimi tarixə düşüb.
Yeni Zelandiya isə qrup mərhələsini 1 xalla sonuncu pillədə başa vuraraq turnirlə vidalaşıb. Komanda daha əvvəl İranla 2:2 hesablı heç-heçə etmiş, Misirə 1:3, Belçikaya isə 1:5 hesabı ilə uduzmuşdu.
Yeni Zelandiya millisinin baş məşqçisi Darren Bazeley oyundan sonra komandasının nəticədən məyus olduğunu, lakin futbolçuların turnirdəki mübarizəsindən qürur duyduğunu bildirib. O, bu təcrübənin komandanın gələcək inkişafı üçün vacib olduğunu qeyd edib.
Belçika isə pley-off mərhələsində ən yaxşı üçüncü yer sahiblərindən biri ilə qarşılaşacaq.
