İspaniya millisi DÇ-2026-nın qrup mərhələsində Uruqvayı 1:0 hesabı ilə məğlub edib.
MSNews.az xəbər verir ki, “H” qrupunun son turunda keçirilən qarşılaşma Meksikanın Qvadalaxara şəhərində baş tutub. Matçın taleyini bir qol həll edib.
Görüşdə yeganə qol 42-ci dəqiqədə vurulub. Aleks Baena Uruqvay qapıçısı Fernando Musleranın səhvindən sonra yaranan imkandan istifadə edərək topu qapıdan keçirib. Bu qol İspaniyaya həm qələbə, həm də qrup liderliyi qazandırıb.
Uruqvay oyuna aqressiv başlasa da, hücumlarda son zərbələrdə dəqiqlik çatışmayıb. Komanda xüsusilə ikinci hissədə hesabı bərabərləşdirməyə çalışsa da, İspaniya müdafiəsi üstünlüyünü qorumağı bacarıb.
Matçın sonlarında Uruqvay futbolçusu Aqustin Kanobbiyo kobud qayda pozuntusuna görə meydandan qovulub. Bu epizod Uruqvayın oyuna qayıtmaq şanslarını daha da azaldıb.
Bu nəticədən sonra İspaniya “H” qrupunu 7 xalla birinci pillədə tamamlayıb. Kabo-Verde üç heç-heçə ilə qrup ikincisi kimi növbəti mərhələyə yüksəlib. Uruqvay və Səudiyyə Ərəbistanı isə hərəyə 2 xalla turnirdən kənarda qalıb.
Uruqvay üçün mundial böyük məyusluqla başa çatıb. Marselo Bielsanın komandası turniri qələbəsiz tərk edib və 48 komandalı formatda pley-offa yüksələ bilməyən yeganə Cənubi Amerika təmsilçisi olub.
İspaniyanın baş məşqçisi Luis de la Fuente isə komandasının qrup mərhələsində çətin oyunlardan keçərək xarakter göstərdiyini bildirib. İspaniya 1/32 final mərhələsinə qrup lideri kimi yollanır.
