Kabo-Verde millisi DÇ-2026-nın qrup mərhələsində Səudiyyə Ərəbistanı ilə 0:0 hesablı heç-heçə edib.
MSNews.az xəbər verir ki, “H” qrupunun son turunda keçirilən qarşılaşma ABŞ-ın Hyuston şəhərində baş tutub. Qolsuz bitən oyun Kabo-Verde üçün tarixi nəticə ilə yadda qalıb.
Debüt mundialında çıxış edən Kabo-Verde bu heç-heçədən sonra qrupda ikinci yeri tutaraq 1/32 final mərhələsinə yüksəlib. Komandanın növbəti rəqibi Argentina millisi olacaq.
Matçın gedişində Səudiyyə Ərəbistanı qələbə üçün daha çox risk etməyə çalışsa da, Kabo-Verde müdafiədə intizamlı oyun nümayiş etdirib. Qapıçı Vozinha və müdafiə xətti rəqibin hücumlarının qarşısını almaqda vacib rol oynayıb.
Kabo-Verde qrup mərhələsində üç oyunun hamısını heç-heçə ilə başa vurub. Komanda əvvəlcə İspaniya ilə 0:0, daha sonra Uruqvayla 2:2, son turda isə Səudiyyə Ərəbistanı ilə 0:0 hesablı heç-heçə edib.
“H” qrupunun digər oyununda İspaniya Uruqvayı 1:0 hesabı ilə məğlub edib. Bu nəticə Kabo-Verdenin ikinci pilləni qorumasına və pley-offa yüksəlməsinə şərait yaradıb.
Səudiyyə Ərəbistanı isə qrup mərhələsini 2 xalla sonuncu pillədə başa vuraraq turnirlə vidalaşıb. Komanda əvvəlki oyunlarda Uruqvayla 1:1, İspaniya ilə isə 0:4 hesablı nəticə göstərmişdi.
Kabo-Verdenin pley-offa yüksəlməsi turnirin ən diqqətçəkən hekayələrindən biri kimi qiymətləndirilir. Kiçik ada ölkəsi ilk dəfə qatıldığı dünya çempionatında qrupdan çıxmağı bacarıb.
