Kanadanın Monreal şəhərində baş verən silahlı insident nəticəsində polis əməkdaşı və mülki şəxs həlak olub.
MSNews.az xəbər verir ki, “Associated Press” hadisənin iyunun 22-də Monrealın Kot-de-Nej rayonunda baş verdiyini yazıb. Məlumata görə, polis uzunlüləli silahla bağlı çağırışdan sonra əraziyə cəlb olunub və hadisə zamanı atışma baş verib.
Nəşrin məlumatına əsasən, atışma nəticəsində 34 yaşlı polis əməkdaşı Mohamed Lamin Benredouan həlak olub. Daha bir polis əməkdaşı ciddi yaralanıb, lakin onun vəziyyətinin sabit olduğu bildirilir.
Hadisə zamanı bir mülki şəxsin də öldüyü açıqlanıb. “CityNews Montreal” həlak olan mülki şəxsin Maykl Moşe Mizrahi olduğunu yazıb.
Şübhəli şəxs polis tərəfindən zərərsizləşdirilib. Rəsmi məlumatlarda hadisənin sinaqoq daxilində baş verməsi və ya əlavə şübhəlinin olması hələlik təsdiqini tapmayıb.
“Al Jazeera” hadisənin Monrealın yəhudi icmasının sıx yaşadığı ərazidə baş verdiyini qeyd edib. Kanada mediasının məlumatına görə, polis sakinlərə bir müddət evdə qalmağı və hadisə yerindən uzaq durmağı tövsiyə edib.
Hadisənin motivi ilə bağlı araşdırma davam edir.
