Fransa polisi narkotik ticarəti ilə bağlı əməliyyat zamanı Pablo Pikassonun oğurlanmış tablosunu aşkarlayıb.
MSNews.az xəbər verir ki, “Le Parisien” polis əməkdaşlarının Val-de-Marne departamentində keçirdiyi əməliyyat zamanı 12-15 milyon avro dəyərində qiymətləndirilən Pikasso əsərinin tapıldığını yazır.
Məlumata görə, tablo narkotik ticarəti ilə bağlı istintaq çərçivəsində aparılan axtarış zamanı aşkarlanıb. Əsərin Pablo Pikassonun sevgilisi və məşhur ilham mənbələrindən biri olan Mariya-Tereza Valteri təsvir etdiyi bildirilir.
“HuffPost” AFP-yə istinadən yazır ki, tablo Val-de-Marne bölgəsində aparılan əməliyyat zamanı tapılıb. Polis həmin iş üzrə 17 kq kannabis, 7 min avro nağd pul və təxminən 200 min avro dəyərində brend geyim də müsadirə edib.
Əməliyyatdan sonra Kretel prokurorluğu oğurluq və cinayət yolu ilə əldə edilmiş əmlakın saxlanılması faktları üzrə ayrıca araşdırma açıb. Hadisə əvvəlcə narkotik ticarəti ilə bağlı istintaq kimi başlayıb, lakin Pikasso tablosunun aşkarlanması işi daha geniş müstəviyə çıxarıb.
“Actu17” yazır ki, əsərin orijinallığı təsdiqlənib və onun Parisdə incəsənət əsərlərinin saxlandığı məkandan oğurlandığı bildirilir.
Məlumata görə, saxlanılan şəxslərdən biri Parisdə incəsənət əsərlərinin saxlanması ilə məşğul olan şirkətdə işləyib. O, dindirilmə zamanı tablonu həmin məkandan çıxardığını etiraf edib.
Şəxs oğurluq faktını boynuna alsa da, bunu şirkətin təhlükəsizlik sistemindəki boşluqları göstərmək istəyi ilə izah edib. Hüquq-mühafizə orqanları isə bu izahatı ayrıca araşdırır.
Fransa mediası yazır ki, tapılan əsərin konkret adı polis tərəfindən açıqlanmayıb. Bununla belə, tablo üzərində aparılan ilkin qiymətləndirmələr onun Pikasso yaradıcılığına aid olduğunu və çox yüksək bazar dəyərinə malik olduğunu göstərir.
Pikassonun Mariya-Tereza Valterə həsr etdiyi əsərləri sənət bazarında ən çox diqqət çəkən işlərdən sayılır. Valter 1920-1930-cu illərdə rəssamın əsas ilham mənbələrindən biri olub və onun obrazı Pikassonun çoxsaylı rəsmlərində yer alıb.
Hazırda istintaq tablonun necə oğurlandığını, kimlər tərəfindən saxlanıldığını və narkotik işi ilə mümkün əlaqəsini müəyyənləşdirməyə çalışır.
