İsrailin Livanın cənubuna endirdiyi zərbələr ABŞ-İran razılaşması fonunda regionda gərginliyi yenidən artırıb.
MSNews.az xəbər verir ki, “Reuters” agentliyinin məlumatına görə, İsrail və İranın dəstəklədiyi “Hizbullah” arasında toqquşmalar gecə saatlarında kəskinləşib. Livan Səhiyyə Nazirliyi İsrail zərbələri nəticəsində gecə yarısından etibarən azı 47 nəfərin öldüyünü bildirib.
İsrail tərəfi zərbələrin “Hizbullah” döyüşçüləri və infrastrukturuna qarşı həyata keçirildiyini açıqlayıb. İsrail rəsmilərinin sözlərinə görə, əməliyyatlar “Hizbullah”ın atəşkəs pozuntularına cavab olaraq aparılıb.
“Hizbullah” isə bu ittihamları rədd edib və İsraili razılaşmanın şərtlərini pozmaqda, mülki şəxslərə və yaşayış məntəqələrinə hücum etməkdə günahlandırıb.
“Reuters” yazır ki, ağır döyüşlər əsasən Litani çayının şimalında yerləşən və strateji əhəmiyyət daşıyan Əli əl-Tahir təpəsi ətrafında cəmlənib. “Hizbullah” İsrail qüvvələrinin irəliləməyə çalışdığı ərazidə pusqu qurduğunu və Merkava tanklarını hədəfə aldığını bildirib.
Daha sonra ABŞ rəsmisi İsrail və “Hizbullah” arasında atəşkəs razılaşmasının əldə olunduğunu açıqlayıb. Məlumata görə, atəşkəs ABŞ və Qətər vasitəçilərinin, eləcə də İranın dəstəyi ilə razılaşdırılıb.
Bununla belə, vəziyyət tam sabitləşmiş hesab olunmur. “Reuters”ə danışan İsrail rəsmisi bildirib ki, “Hizbullah” hücum etmədiyi halda İsrail bunu müharibə vəziyyəti kimi qiymətləndirməyəcək, lakin İsrail qüvvələri Livanın cənubunda qalacaq.
Daha əvvəl “Reuters” İsrailin Livanın cənubunda hərbi mövcudluğunu davam etdirmək üçün ABŞ-la danışıqlar apardığını yazmışdı. Bu məsələ ABŞ-İran memorandumunda regionda hərbi əməliyyatların dayandırılması tələbi fonunda mübahisə doğurur.
“The Guardian” qeyd edir ki, ABŞ Prezidenti Donald Tramp bütün cəbhələrdə, o cümlədən Livan, “Hizbullah” və İsrail arasında tam atəşkəs gözlədiyini bildirib.
Hazırda əsas sual İsrail qüvvələrinin Livanın cənubundakı mövqelərdən çıxıb-çıxmayacağı və atəşkəsin real şəkildə icra olunub-olunmayacağıdır.
