UFC tarixinin ən qeyri-adi turnirlərindən biri Ağ Evin Cənub çəmənliyində keçirilib.
MSNews.az xəbər verir ki, Vaşinqtonda təşkil olunan “UFC Freedom 250″ turniri ABŞ-ın 250 illiyi ilə bağlı tədbirlər çərçivəsində baş tutub. “UFC”in rəsmi məlumatına görə, yarış iyunun 14-də Ağ Evdə keçirilib və Paramount+ platformasında yayımlanıb.
Turnirin əsas döyüşündə Castin Geyci İliya Topuriyanı məğlub edərək yüngül çəkidə UFC çempionu olub. “Reuters”in məlumatına görə, Topuriya ilk raundlarda üstün görünsə də, Geyci döyüşün gedişini dəyişib və dördüncü raunddan sonra Topuriyanın küncü qarşılaşmanı dayandırıb.
Gecənin ikinci əsas döyüşündə Siril Qan Aleks Pereyranı məğlub edərək müvəqqəti ağır çəki kəmərini qazanıb. “Reuters” yazır ki, Pereyra bu qələbə ilə UFC-də üç fərqli çəkidə çempion olan ilk idmançı olmaq şansını itirib.
Tədbir yalnız idman nəticələri ilə deyil, keçirildiyi məkanla da diqqət çəkib. “AP” turniri Ağ Evdə keçirilən ilk peşəkar idman tədbiri kimi təqdim edib. Yarış Donald Trampın 80 illiyi və ABŞ-ın 250 illiyi fonunda təşkil olunan tədbirlər proqramına daxil edilib.
Turnir siyasi müzakirələrlə də müşayiət olunub. “The Guardian” yazır ki, tədbirin Ağ Ev ərazisində keçirilməsinin qarşısını almaq üçün məhkəməyə müraciət edilsə də, federal hakim son anda turnirin dayandırılması tələbini rədd edib.
“TIME”ın məlumatına görə, məhkəmə sənədlərində UFC Freedom 250-nin təşkilatçılara 60 milyon dollardan çox başa gəldiyi göstərilib. “Reuters” isə daha əvvəl Paramount-un UFC-nin ABŞ yayım hüquqlarını 7 il müddətinə 7,7 milyard dollara aldığını yazmışdı.
Bu baxımdan UFC Freedom 250 təkcə idman turniri yox, həm də UFC-nin yeni kommersiya mərhələsinin simvolu kimi qiymətləndirilir. Ağ Evin Cənub çəmənliyində oktagonun qurulması idman, siyasət, media və biznesin bir araya gəldiyi nadir hadisələrdən biri kimi tarixə düşüb.
