İranın Ramat-David aviabazasına zərbəsindən sonra İsrail Hərbi Hava Qüvvələrinin xüsusi eskadrilyasının zərər gördüyü iddia olunur.
MSNews.az xəbər verir ki, sosial şəbəkələrdə və bəzi media resurslarında iyunun 10-da İranın İsrailin Ramat-David aviabazasına endirdiyi zərbə nəticəsində radioelektron mübarizə ilə əlaqəli eskadrilyalardan birinin sıradan çıxa biləcəyi barədə məlumatlar yayılıb.
Lakin bu iddia hələlik rəsmi təsdiqini tapmayıb. “The Jerusalem Post”un məlumatına görə, İsrail ordusu Ramat-David aviabazasında İran raketinin qalıqları nəticəsində kiçik zərər dəydiyini təsdiqləyib. Məlumata əsasən, insident zamanı xəsarət alan olmayıb və bazanın uçuş əməliyyatlarında fasilə yaranmayıb.
“Anadolu Agentliyi” də İsrail ictimai yayım qurumu KAN-a istinadən yazır ki, zərər bazadakı avadanlıq anbarlarından birində qeydə alınıb. İsrail tərəfi zərərin miqyası və konkret hərbi bölmələrə təsiri barədə əlavə məlumat açıqlamayıb.
“Times of Israel” isə peyk görüntülərində bazadakı anqarlardan birində mümkün zərər izlərinin göründüyünü yazıb. Bununla belə, nəşr görüntülərin aşağı keyfiyyətli olduğunu və zərərin dəqiq xarakterinin hələ aydın olmadığını qeyd edib.
Beləliklə, Ramat-David aviabazasına zərər dəyməsi barədə məlumat təsdiqlənsə də, İsrail Hərbi Hava Qüvvələrinin 155-ci eskadrilyasının və ya radioelektron mübarizə ilə bağlı hər hansı konkret bölmənin sıradan çıxması barədə iddialar hələlik rəsmi təsdiqini tapmayıb.
