Fransa Silahlı Qüvvələri Baltikyanı ölkələr üzərində Rusiyaya məxsus iki Su-30 qırıcısının qarşılandığını bildirib.
Fransa Silahlı Qüvvələrinin məlumatına görə, hadisə zamanı Litvanın Şyaulyay aviabazasında yerləşən Fransaya məxsus Rafale qırıcıları qısa müddətdə havaya qaldırılıb. Təyyarələr uçuş planı olmadan Baltikyanı ölkələrin hava məkanına daxil olduğu bildirilən iki Rusiya Su-30 qırıcısını müşayiət etmək üçün göndərilib.
Fransız hərbçiləri əmrin verilməsindən sonra Rafale qırıcılarının operativ şəkildə bazanı tərk etdiyini və Su-30-ları qarşılayaraq müşayiət etdiyini açıqlayıb. Bununla belə, insidentin dəqiq tarixi və konkret hansı Baltikyanı ölkənin hava məkanında baş verdiyi barədə əlavə detal paylaşılmayıb.
Hadisə NATO-nun Baltik hava polisi missiyası çərçivəsində baş verib. Bu missiya Litva, Latviya və Estoniyanın hava məkanının qorunmasına yönəlib. Baltikyanı ölkələrin öz daimi qırıcı aviasiyası olmadığından, NATO müttəfiqləri rotasiya əsasında bölgəyə döyüş təyyarələri yerləşdirir.
“Associated Press” daha əvvəl yazırdı ki, Fransanın Rafale qırıcıları Litvadakı Şyaulyay bazasından NATO-nun Baltik hava polisi missiyasında iştirak edir. Agentliyin məlumatına görə, NATO qırıcıları Baltik regionunda Rusiya hərbi təyyarələrini mütəmadi olaraq qarşılayır, çünki bu təyyarələr çox vaxt transponderləri söndürülmüş, uçuş planı təqdim edilməmiş və hava hərəkəti idarəetməsi ilə əlaqə yaratmadan uçur.
Son aylarda Baltik dənizi üzərində oxşar insidentlərin sayı artıb. “Associated Press”in məlumatına görə, Litva Müdafiə Nazirliyi aprelin 13-19-u arasında NATO qırıcılarının Rusiya təyyarələrini qarşılamaq üçün dörd dəfə havaya qaldırıldığını bildirmişdi.
Fransa kontingentinin Baltik regionundakı fəaliyyəti Ukrayna müharibəsi fonunda NATO-nun şərq cinahında hava müdafiəsinin gücləndirilməsi siyasətinin bir hissəsi kimi qiymətləndirilir.
