Almaniya futbolunda gözlənilməz nəticə qeydə alınıb. “Volfsburq” Bundesliqada qalmaq uğrunda pley-off mərhələsinin cavab oyununda səfərdə “Paderborn”a 1:2 hesabı ilə uduzaraq 2-ci Bundesliqaya düşüb.
İlk oyun 0:0 hesabı ilə başa çatmışdı, cavab görüşündə isə “Paderborn” əlavə vaxtda qələbə qolunu vuraraq elitaya yüksəlib.
“Volfsburq” 1997-ci ildə Bundesliqaya yüksəldikdən sonra Almaniyanın yüksək divizionunda fasiləsiz çıxış edirdi. Klub 2009-cu ildə ölkə çempionu olmuş, 2015-ci ildə isə Almaniya Kubokunu qazanmışdı. Lakin bu dəfə komanda pley-off sınağından keçə bilməyib.
Cavab oyununa “Volfsburq” yaxşı başlayıb və 3-cü dəqiqədə Dzenan Peyçinoviçin qolu ilə hesabı açıb. Ancaq Joakim Mele erkən qırmızı vərəqə alaraq komandasını azlıqda qoyub. “Paderborn” Filip Bilbiyanın qolu ilə fasiləyədək hesabı bərabərləşdirib, əlavə vaxtda isə Laurin Çurda həlledici qolu vurub.
Bu nəticə “Paderborn” üçün Bundesliqaya üçüncü yüksəliş olub. Komanda daha əvvəl 2014 və 2019-cu illərdə də elit diviziona çıxmışdı. “Volfsburq” isə 2017 və 2018-ci illərdə pley-offlarda qalmağı bacarsa da, bu dəfə mövsümü acı sonluqla tamamlayıb.
Mövsümün son həftələrində “Volfsburq” azarkeşləri ruhlandırmaq üçün klubun tarixi emblemini geri qaytarmışdı. SportsLogos.Net yazır ki, klub mayın 9-da “Bavariya” ilə son ev oyunundan əvvəl 24 ildən sonra klassik gerbə qayıtdığını elan etmişdi. Bu addım azarkeşlər arasında böyük emosiyaya səbəb olsa da, komandanı Bundesliqada saxlamağa kifayət etməyib.
