Braziliya futbolunun ulduzu Neymar milli komandadakı karyerasını başa vurduğunu açıqlayıb.
MSNews.az xəbər verir ki, 34 yaşlı futbolçu bu qərarı DÇ-2026-nın 1/8 finalında Braziliyanın Norveçə 1:2 hesabı ilə məğlub olduğu oyundan sonra verib. Qarşılaşma ABŞ-ın Nyu-Cersi ştatındakı “MetLife Stadium”da keçirilib.
Neymar oyuna ikinci hissədə daxil olub və əlavə olunmuş vaxtda penaltidən fərqlənərək Braziliyanın yeganə qolunu vurub. Lakin bu qol komandasını məğlubiyyətdən xilas etməyib. Norveçin qələbəsi Braziliyanın mundialla erkən vidalaşmasına səbəb olub.
Matçdan sonra Neymar emosional açıqlama verib. O, Braziliya millisi ilə dünya çempionu olmaq üçün çalışdığını, lakin artıq bu mərhələnin başa çatdığını bildirib. “Reuters” futbolçunun “çalışdım, çalışdım… artıq bitdi” sözlərini səsləndirdiyini yazır.
Neymarın milli komanda ilə son oyununun simvolik məqamı da diqqət çəkib. Onun Braziliya millisində debüt etdiyi stadion da məhz “MetLife Stadium” idi. Beləliklə, futbolçu milli karyerasına başladığı arenada Braziliya forması ilə son matçına çıxıb.
Braziliya millisində uzun illər əsas simalardan biri olan Neymar yığma karyerasını 130 oyun, 80 qol və 58 məhsuldar ötürmə ilə başa vurur. O, Braziliya millisinin tarixində ən məhsuldar futbolçulardan biri kimi yadda qalacaq.
Bununla belə, Neymar milli komanda ilə dünya çempionluğu qazana bilmədi. Onun Braziliya ilə əsas uğurlarından biri 2013-cü ildə Konfederasiyalar Kubokunu qazanması olub. DÇ-2026-da Norveçə məğlubiyyət isə onun yığmadakı 16 illik karyerasının son nöqtəsi kimi tarixə düşdü.
