Rusiya Prezidenti Vladimir Putinin Çinə rəsmi səfərinin başlanmasından ilk görüntülər yayımlanıb. Çin dövlət mediası CGTN Rusiya liderinin Pekinə gəlişini əks etdirən kadrları təqdim edib. Məlumata görə, Putin Çin Xalq Respublikasına iki günlük dövlət səfəri üçün gəlib.
Rusiya mediasının məlumatına əsasən, Vladimir Putin Pekinə Çin Sədri Si Cinpinin dəvəti ilə səfər edib. Onu hava limanında Çinin xarici işlər naziri Van İ qarşılayıb. Səfər Rusiya-Çin mehriban qonşuluq, dostluq və əməkdaşlıq haqqında müqavilənin 25 illiyi fonunda baş tutur.
Səfərin əsas işçi proqramı mayın 20-də başlayıb. Pekində Rusiya nümayəndə heyətinin rəsmi qarşılanma mərasimi keçirilib, daha sonra Vladimir Putin və Si Cinpin arasında danışıqlar aparılıb. Putin görüş zamanı Rusiya-Çin münasibətlərinin “misilsiz səviyyəyə” çatdığını bildirib və Si Cinpini gələn il Rusiyaya səfərə dəvət edib.
“Associated Press” yazır ki, Si Cinpin Putini Pekində Böyük Xalq Zalında rəsmi mərasimlə qarşılayıb. Mərasimdə fəxri qarovul düzülüb, Rusiya və Çin bayraqları qaldırılıb. Bundan sonra iki ölkə nümayəndə heyətləri arasında danışıqlar keçirilib və əməkdaşlıq sənədlərinin imzalanması nəzərdə tutulub.
Səfər çərçivəsində enerji, təhlükəsizlik, ticarət və strateji tərəfdaşlıq məsələlərinin müzakirə olunduğu bildirilir. Rusiya tərəfi Çinin Rusiya neft və qazı üçün əsas alıcılardan biri olduğunu vurğulayır. Tərəflər 2001-ci ildə imzalanmış dostluq müqaviləsinin müddətinin uzadılması istiqamətində də razılığa gəliblər.
