Ukraynanın Xerson vilayətində BMT-nin aydın şəkildə nişanlanmış humanitar karvanı dron hücumuna məruz qalıb. Hadisə mayın 14-də Xersonun Korabelnı rayonunda, Ostriv ərazisində baş verib. Karvan mülki əhaliyə ərzaq və digər zəruri humanitar yardım çatdırırdı.
MSNews.az xəbəri “The Kyiv Post”-a istinadən verir.
Ukrayna Prezidenti Volodimir Zelenskinin bildirdiyinə görə, hücum zamanı avtomobildə BMT-nin Ukraynadakı Humanitar Məsələlərin Əlaqələndirilməsi Ofisinin — OCHA-nın rəhbəri Andrea De Domeniko və daha 8 BMT əməkdaşı olub. Ukrayna tərəfi hücumun Rusiyaya məxsus FPV dronları ilə həyata keçirildiyini açıqlayıb. BMT əməkdaşları təhlükəsiz şəkildə təxliyə edilib, onlar arasında xəsarət alan olmayıb.
Xerson vilayət hərbi administrasiyasının rəhbəri Oleksandr Prokudin hadisəni beynəlxalq humanitar hüququn kobud pozuntusu adlandırıb. Onun sözlərinə görə, hücum BMT-nin humanitar missiyasına məxsus avtomobillərə qarşı həyata keçirilib və nəqliyyat vasitələrinin üzərində BMT loqosu aydın şəkildə görünürdü.
BMT-nin humanitar məsələlər üzrə rəhbəri Tom Fletçer hücumu “mümkün hədəfli hücum” kimi qiymətləndirib. O bildirib ki, BMT əməkdaşları sağ qaldıqları üçün “çox şanslı” olublar və qurum hadisə ilə bağlı tam araşdırma və məsuliyyət tələb edəcək. BMT həmçinin humanitar personalın və onların əmlakının beynəlxalq humanitar hüquqla qorunduğunu xatırladıb.
Bununla yanaşı, BMT hücumu rəsmi şəkildə konkret tərəfə aid etməyib. Karvanın hərəkəti əvvəlcədən həm Ukrayna, həm də Rusiya tərəfi ilə koordinasiya olunmuşdu, lakin BMT zərbənin kim tərəfindən endirildiyini açıqlamayıb.
“World Central Kitchen” təşkilatı həmin gün Xersonda humanitar işçilərə qarşı ayrıca dron hücumunun da baş verdiyini açıqlayıb. Təşkilatın məlumatına görə, WCK-nin tərəfdaşına məxsus zirehli avtomobil isti yemək çatdırarkən vurulub, xəsarət alan olmayıb. WCK həmçinin OCHA avtomobilinin də humanitar yardım çatdırdığı zaman hədəfə alındığını və hadisə zamanı yerli sakinin öldüyünü bildirib.
Ukrayna tərəfi hücumu müharibə cinayəti kimi qiymətləndirib. WCK-nin qurucusu Xose Andres də humanitar işçilərə qarşı hücumları “müharibə cinayəti” adlandıraraq beynəlxalq ictimaiyyətin bunu normal hal kimi qəbul etməməli olduğunu bildirib.
