ABŞ vitse-prezidenti Cey Di Vens Avropa siyasi elitalarını sərt tənqid edərək bildirib ki, Vaşinqton Avropadan “öz rəhbərliyinin etməkdən imtina etdiyi şeyi — öz qayğısına qalmağı” tələb edir. Vens bu fikirləri “Newsmax”-a müsahibəsində səsləndirib.
Vens ABŞ administrasiyasının Avropaya qarşı mənfi münasibətdə olması barədə iddiaları rədd edib. Onun sözlərinə görə, Prezident Donald Tramp, özü və dövlət katibi Marko Rubio Avropaya “nifrət etmir”, əksinə, Avropanın özünü qorumasını və daha güclü olmasını istəyir.
ABŞ vitse-prezidenti bildirib ki, Vaşinqtonun Avropadan sərhədlərinə nəzarət etməsini tələb etməsi “Avropa sivilizasiyasının qorunması” ilə bağlıdır. O, iqtisadi artım və NATO məsələlərinin də ABŞ üçün vacib olduğunu qeyd edərək, Avropanı dünyanın ən mühüm müttəfiqlərindən biri adlandırıb.
Vens NATO ilə bağlı danışarkən bildirib ki, ABŞ Avropanın mümkün hücum halında özünü müdafiə edə bilməsini istəyir. Onun sözlərinə görə, Tramp administrasiyası NATO-nun yalnız ABŞ təhlükəsizlik çətiri kimi qalmasını deyil, Avropa ölkələrinin daha müstəqil və məsuliyyətli müdafiə sistemi qurmasını istəyir.
Bu açıqlamalar Vaşinqtonla Avropa paytaxtları arasında müdafiə xərcləri, miqrasiya siyasəti, NATO-nun gələcəyi və Qrenlandiya məsələsi ətrafında gərginliyin davam etdiyi bir dövrdə səslənib. Britaniya parlamentinin araşdırma sənədində də qeyd olunur ki, Tramp administrasiyasının Qrenlandiya ilə bağlı mövqeyi ABŞ-Avropa münasibətlərində ciddi diplomatik narazılıq yaradıb.
Vensin Avropa ilə bağlı ritorikası yeni deyil. O, 2025-ci ildə Münhen Təhlükəsizlik Konfransında da Avropa liderlərini söz azadlığı, miqrasiya və seçici iradəsinə münasibət məsələlərində tənqid etmişdi. Həmin çıxış Avropa rəsmiləri arasında narazılıq doğurmuş və ABŞ-Avropa münasibətlərində yeni mübahisə dalğası yaratmışdı.
