Slovakiyanın Baş naziri Robert Fitso İrəvanda keçirilən Avropa Siyasi Birliyinin VIII Sammiti çərçivəsində Ukrayna Prezidenti Volodimir Zelenski ilə görüşüb. Zelenski görüşdən sonra bildirib ki, tərəflər müxtəlif sahələrdə əməkdaşlığı, yaxın vaxtlarda hökumətlərarası komissiya formatında iclasın keçirilməsini və qarşılıqlı səfərləri müzakirə ediblər.
MSNews.az xəbəri “The Kyiv Independent” nəşrinə istinadən verir.
Fitso, eyni zamanda, mayın 9-da Moskvaya səfər edəcəyini və Rusiya Prezidenti Vladimir Putinlə qısa görüşünün nəzərdə tutulduğunu açıqlayıb. Slovakiya hökumətinin başçısı bildirib ki, Qırmızı Ordunun naməlum əsgərinin məzarı üzərinə gül qoyaraq Slovakiya xalqı adından azadlığa görə minnətdarlığını ifadə edəcək.
Baş nazir Moskva səfərinin Qələbə paradında iştirak formatında olmayacağını vurğulayıb. “Qısa görüş olacaq vəssalam. Mən heç bir paradda iştirak etmək niyyətində deyiləm”, — deyə Fitso bildirib. Bu açıqlama Kremlin daha əvvəl onu mayın 9-da Moskvadakı hərbi paradın xarici qonaqları arasında göstərməsindən sonra səslənib.
Fitso bildirib ki, Avropa Siyasi Birliyinin İrəvan sammitində Avropa liderlərindən heç kim ona Moskvaya planlaşdırılan səfəri barədə sual verməyib. Onun sözlərinə görə, Slovakiya ilə Rusiya arasında dialoq üçün “təkzib edilə bilməyən arqumentlər” var və o, bu səfərə görə peşmançılıq hissi keçirməyə məcbur edilməsinə imkan verməyəcək.
Slovakiya Baş nazirinin Moskva səfəri Avropa daxilində mübahisəli addım kimi qiymətləndirilir. Rusiya Ukraynaya qarşı genişmiqyaslı müharibəsini davam etdirdiyi bir vaxtda Aİ ölkələrinin əksəriyyəti Kreml ilə yüksək səviyyəli təmaslardan çəkinir. Bununla belə, Fitso son aylarda Moskva ilə dialoqun zəruri olduğunu müdafiə edir və Ukrayna ilə bağlı sülh razılaşmasının Kiyevin razılığı olmadan mümkün olmadığını da bildirib.
