Avstriyada “HiPP” uşaq qidalarına siçan zəhəri qatılması ilə bağlı 39 yaşlı kişi saxlanılıb. Avstriya polisi bildirib ki, şübhəli şəxs mərkəzi Avropada supermarket rəflərində aşkarlanan zəhərli uşaq qidaları ilə əlaqədar aparılan araşdırma çərçivəsində həbs edilib. Hadisə istehsalçı şirkət tərəfindən şantaj yolu ilə pul tələb edilməsi cəhdi kimi qiymətləndirilir.
MSNews.az xəbəri “Reuters”–ə istinadən verir.
Məlumata görə, apreldə Avstriya, Çexiya və Slovakiya ərazisində “HiPP” markalı uşaq qidasının beş qabında müdaxilə izi aşkarlanıb və həmin məhsullar istehlak edilməzdən əvvəl dövriyyədən çıxarılıb. Lakin altıncı qabın hələ də tapılmadığı, onun Avstriyada ola biləcəyi bildirilir.
“The Guardian” daha əvvəl yazmışdı ki, Avstriyada “HiPP”in kök və kartof tərkibli uşaq qidası qabında siçan zəhəri aşkarlanıb. Bundan sonra şirkət məhsulların sonradan qəsdən dəyişdirilmiş ola biləcəyini açıqlayıb və təhlükəsizlik məqsədilə geri çağırma prosesinə başlayıb.
“HiPP”in məlumatına əsasən, hadisə şirkətdən 2 milyon avro tələb edilməsi ilə bağlı şantaj cəhdi ilə əlaqələndirilir. “Reuters” yazır ki, martın 27-də şirkətə göndərilən hədə məktubunda aprelin 2-dək pul ödənilməyəcəyi halda Avstriya, Çexiya və Slovakiyada seçilmiş supermarketlərə zəhərli məhsullar yerləşdiriləcəyi bildirilib. Şirkət həmin məktubu nadir yoxlanılan ümumi elektron poçt ünvanına gəldiyi üçün gec gördüyünü açıqlayıb.
Hadisədən sonra “HiPP” Avstriyada “SPAR”, “EUROSPAR”, “INTERSPAR” və “Maximarkt” mağazalarında satılan bəzi uşaq qidalarını ehtiyat tədbiri kimi geri çağırıb. Çexiya və Slovakiyada da məhsullar rəflərdən yığışdırılıb. Şirkət bildirib ki, məhsullar istehsal müəssisəsindən tam normal vəziyyətdə çıxıb və məsələ istehsal qüsuru yox, sonradan edilən kriminal müdaxilə kimi araşdırılır.
İndiyədək zəhərli məhsullardan istifadə nəticəsində xəsarət alan olmayıb. Bununla belə, rəsmi xəbərdarlıqlarda istehlakçılara ağ stiker və qırmızı dairə ilə işarələnmiş qablar, zədələnmiş qapaqlar, qeyri-adi qoxu və açılarkən xarakterik “pop” səsinin olmaması kimi əlamətlərə diqqət yetirmək tövsiyə olunur.
