ABŞ Dövlət Departamenti ölkənin müstəqilliyinin 250 illiyi münasibətilə məhdud sayda xüsusi dizaynlı pasportların buraxılmasına hazırlaşır.
“The Bulwark” nəşrinin məlumatına görə, yeni dizayn layihələrindən birində ABŞ Prezidenti Donald Trampın portreti pasportun daxili üz qabığında, Müstəqillik Bəyannaməsinin fonunda yerləşdirilib və onun qızılı rəngdə imzası əlavə olunub.
Dövlət Departamentinin sözçüsü Tommi Piqott “TIME”-a açıqlamasında təsdiqləyib ki, ABŞ-ın 250 illiyi münasibətilə “məhdud sayda xüsusi dizaynlı pasport” hazırlanır. Onun sözlərinə görə, bu pasportlarda fərdiləşdirilmiş təsvirlər və genişləndirilmiş vizual elementlər olacaq, lakin sənədlər mövcud təhlükəsizlik xüsusiyyətlərini qoruyacaq.
“The Bulwark” ilkin məlumatında 25 min ədədlik məhdud buraxılışdan danışsa da, “TIME” yazır ki, Dövlət Departamentinin rəsmisi bu rəqəmi təkzib edib və dəqiq say açıqlamayıb. Rəsmi məlumata görə, xüsusi pasportlar əlavə ödəniş olmadan təqdim ediləcək və tətbiq dövründə pasport üçün müraciət edən ABŞ vətəndaşları üçün əlçatan olacaq.
Layihəyə əsasən, pasportun digər səhifələrində Con Trambullun “Müstəqillik Bəyannaməsi” əsərindən ilhamlanan təsvirlər, arxa üz qabığında isə 1777-ci il ABŞ bayrağı motivi və 13 ulduzun mərkəzində “250” işarəsi yer alacaq. Bu dizaynın Amerika müstəqilliyinin 250 illiyi ilə bağlı “America250” tədbirləri çərçivəsində hazırlandığı bildirilir.
Məsələ ABŞ-da müzakirələrə səbəb olub. Tənqidçilər müasir pasportlarda fəaliyyətdə olan prezidentin portretinin yerləşdirilməsini qeyri-adi və siyasi baxımdan mübahisəli addım kimi qiymətləndirirlər. Dövlət Departamenti isə bunu yubiley münasibətilə hazırlanmış xüsusi dizayn kimi təqdim edir və sənədlərin standart təhlükəsizlik tələblərinə cavab verəcəyini bildirir.
