Ermənistanın baş naziri Nikol Paşinyan parlamentdə çıxışı zamanı Qarabağ məsələsi ilə bağlı sərt bəyanatlar verib.
O bildirib ki, hakim “Vətəndaş müqaviləsi” partiyası Qarabağ hərəkatını davam etdirməmək qərarı verib. Paşinyanın sözlərinə görə, bu hərəkatın davamı birbaşa müharibəyə gətirib çıxarır, sülh yolunun seçilməsi isə onun dayandırılmasını tələb edir.
Baş nazir qeyd edib ki, Qarabağ hərəkatı adı altında Ermənistan uzun illər xarici geosiyasi maraqların alətinə çevrilib. Onun fikrincə, ölkənin əsas problemlərindən biri də məhz bu siyasət olub.
Paşinyan çıxışında həmçinin Kollektiv Təhlükəsizlik Müqaviləsi Təşkilatını (KTMT) tənqid edərək bildirib ki, 2020-ci ildə təhlükəsizlik zəmanəti kimi təqdim olunan bu qurum əslində Ermənistanı “fəlakətə sürükləyib”.
O, Qarabağdakı separatçı qüvvələri də tənqid edərək, onların illər ərzində bölgə əhalisini inkişafdan məhrum etdiyini və “girov vəziyyətində saxladığını” iddia edib.
Baş nazir, eyni zamanda, keçmiş siyasi və hərbi elitanı sərt şəkildə ittiham edərək, onları dövlətçiliyə zərbə vurmaqda günahlandırıb.
Ekspertlər hesab edir ki, bu açıqlamalar Ermənistanın gələcək siyasətində sülh istiqamətinə yönəlmə siqnalı kimi qiymətləndirilə bilər.
