İsrail mediasının məlumatına görə, İsrail Müdafiə Ordusu (SAXAL) və Mossad qapalı brifinqlərdə İranın Husi rəhbərliyinə təzyiq göstərərək onları İsrail və ABŞ-a qarşı müharibəyə cəlb etməyə çalışdığını iddia edib.
Məlumata əsasən, məqsəd regionda tammiqyaslı ikinci cəbhə açmaq və bununla da ABŞ və İsrailin hava hücumundan müdafiə sistemlərini İran ərazisinə yönəlmiş zərbələrdən yayındırmaqdır.
Kəşfiyyat qiymətləndirmələrinə görə, mümkün aktivləşmə üçün əsas zaman pəncərəsi Ramazan ayının başa çatdığı dövr hesab olunur. Mənbələr bildirir ki, bu müddət ərzində husilər qüvvələrini yenidən toparlayır və ilin əvvəlində zərər görmüş raket arsenalını bərpa edirlər.
İsrailin müdafiə strukturlarına yaxın mənbələr qeyd edir ki, martın ilk yarısında müşahidə olunan nisbi sakitlik müvəqqəti xarakter daşıyıb və dini təqvim, eləcə də logistik səbəblərlə bağlı olub.
Eyni zamanda, kəşfiyyat məlumatlarına görə, husilər Ramazan ayından yeni döyüşçülərin cəlb olunması və ideoloji hazırlıq üçün də istifadə ediblər.
Hazırda bu məlumatlar rəsmi səviyyədə təsdiqlənməyib və əsasən kəşfiyyat qiymətləndirmələri və media iddiaları kimi təqdim olunur.
