Çexiyanın Pardubice şəhərində İsrailin silah şirkəti “Elbit Systems” ilə əlaqəli olduğu bildirilən fabrikdə yanğın baş verib. Hadisə ilə bağlı yerli hüquq-mühafizə orqanları terror şübhəsi ilə istintaqa başlayıb.
Çexiya polisi bildirib ki, yanğın şəhərin Delnicka küçəsində yerləşən sənaye obyektində qeydə alınıb. Hadisə yerinə dərhal yanğınsöndürən və təhlükəsizlik qüvvələri cəlb olunub, ərazi nəzarətə götürülüb. Rəsmi açıqlamaya görə, insident zamanı xəsarət alan olmayıb və ətraf sakinlər üçün təhlükə yaranmayıb.
Polis əlavə edib ki, hadisəyə görə məsuliyyəti üzərinə götürdüyünü iddia edən qrup barədə məlumatlar daxil olub. Lakin hüquq-mühafizə orqanları bu iddiaların hələlik təsdiqlənmədiyini və yalnız dəqiqləşdirilmiş məlumatların paylaşılacağını vurğulayıb.
Yerli mediaya görə, özünü “The Earthquake Faction” adlandıran qrup jurnalistlərə göndərdiyi məktubda hücuma görə məsuliyyəti üzərinə götürdüyünü bildirib. Qrup açıqlamasında bu addımı İsrailin Qəzza zolağında həyata keçirdiyi hərbi əməliyyatlara etiraz kimi əsaslandırıb və fabriki “İsrail silah sənayesinin Avropadakı mərkəzlərindən biri” kimi təqdim edib.
Məlumata görə, sözügedən obyekt Çexiyanın silah istehsalçısı olan “LPP Holding” şirkətinə məxsusdur. Şirkət bir neçə il əvvəl “Elbit Systems” ilə əməkdaşlıq çərçivəsində Pardubicedə pilotsuz uçuş aparatlarının istehsalı və inkişafı ilə bağlı planlarını açıqlamışdı.
Hadisə Avropada təhlükəsizlik məsələləri və silah sənayesi ətrafında artan gərginlik fonunda baş verib. Ekspertlər bildirirlər ki, bu cür insidentlər regionda siyasi və ideoloji qarşıdurmaların daha da kəskinləşdiyini göstərir.
