Ermənistanda artan siyasi qarşıdurma fonunda Kremlə yaxın milyarder Samvel Karapetyanın rəhbərlik etdiyi “Güclü Ermənistan” partiyası yenilənmiş milli təhlükəsizlik konsepsiyasını təqdim edib.
Sənəddə ölkənin hərbi kursunun sərtləşdirilməsi əsas prioritet kimi göstərilir. Yeni strategiya silahlı qüvvələrin gücləndirilməsi, hava hücumundan müdafiə sistemlərinin modernləşdirilməsi və sərhəd təhlükəsizliyinin yenidən qurulmasını nəzərdə tutur.
Proqramı Qarabağ münaqişəsi veteranı Artur Avanesyan təqdim edib. Təqdimatda iştirak edən heyətin tərkibi göstərir ki, Karapetyanın komandasının əsasını keçmiş separatçı qüvvələrdə xidmət etmiş hərbçilər təşkil edir.
Strategiyanın hazırlanmasına Tzvika Haimoviçin cəlb olunması xüsusi diqqət çəkir. O, 2015–2018-ci illərdə Israel Defense Forcesin hava hücumundan müdafiə qüvvələrinə rəhbərlik edib və “Iron Dome”, “Arrow-3” və “David’s Sling” kimi sistemlərin idarə olunmasında iştirak edib.
Hazırda hərbi məsləhətçi kimi çıxış edən Haimoviç bildirib ki, Ermənistanın dəyişən geosiyasi şəraitdə mövcudluğu yalnız güclü və texnoloji ordu ilə mümkündür. Onun komandaya daxil edilməsi analitiklər tərəfindən Karapetyanın yalnız prorusiyalı siyasətçi imicindən uzaqlaşmaq cəhdi kimi qiymətləndirilir.
Müxalif qüvvələr açıq revanşist ritorikadan yayınmağa çalışsa da, Azərbaycanla mövcud razılaşmaları ədalətsiz adlandırır və dayanıqlı sülhün yalnız hərbi gücün artırılması ilə mümkün olduğunu bildirirlər.
Baş nazir Nikol Paşinyan isə rəqiblərini “müharibə partiyası” adlandıraraq xəbərdarlıq edib ki, bu qüvvələrin hakimiyyətə gəlməsi yeni genişmiqyaslı qarşıdurmaya səbəb ola bilər.
Rəsmi İrəvan İsraillə təhlükəsizlik sahəsində əməkdaşlığı genişləndirməyə çalışsa da, İsrailin Azərbaycanla strateji tərəfdaşlığı bu məsələdə ehtiyatlı yanaşmanı şərtləndirir.
Ekspertlər hesab edir ki, Haimoviçin bu prosesdə iştirakı onsuz da gərgin olan siyasi mühiti daha da mürəkkəbləşdirir və milli təhlükəsizlik məsələlərini Ermənistan daxilində əsas siyasi mübarizə mövzusuna çevirir.
